USD 434.84 EUR 498.2
RUB 5.72 CNY 68.47
جاڭالىقتار

تۇركىستان وبلىسىندا مال ۇرلىعىمەن اينالىسقان 2 ۇيىمداسقان قىلمىستىق توپ ۇستالدى

8 جەلتوقسان 11:07
:ءبولىسۋ
تۇركىستان وبلىسىندا مال ۇرلىعىمەن اينالىسقان 2 ۇيىمداسقان قىلمىستىق توپ ۇستالدى

تۇركىستان. قازاقپارات - ورداباسى مەن ارىس اۋدانىندا مال ۇرلاپ كەلگەن ەكى ۇيىمداسقان قىلمىستىق توپ ۇستالدى.

تۇرعىندارعا جالپى 18 ميلليون تەڭگە شىعىن كەلتىرىلگەن، دەپ حابارلايدى قازاقپارات ءتىلشىسى.

بۇل تۋرالى تۇركىستان وبلىسى پوليسيا دەپارتامەنتى باستىعىنىڭ ورىنباسارى قۇرمانبەك ساحوۆ ايتىپ بەردى.

«ورداباسى اۋدانىندا مال ۇرلىعىمەن اينالىسقان 5 كۇدىكتىنى ۇستادىق. ياعني، قىلمىستى ۇيىمداستىرۋشى مەن سىبايلاستارى قولعا ءتۇستى. سونداي- اق، جىلقى ەتىن ساتىپ الىپ وتىرعان ساتۋشى ايەل دە ۇستالدى»، - دەدى ق. ساحوۆ.

كۇدىكتىلەردىڭ ءبىرى بۇرىن دا مال ۇرلاعانى ءۇشىن سوتتالعان شىمكەنت قالاسىنىڭ تۇرعىنى. ال قالعاندارى ءبىر- بىرىنە تۋىس ورداباسى اۋدانىنىڭ تۇرعىندارى. قىلمىستىق توپ قۇنى 10,4 ميلليون بولاتىن 26 جىلقىنى ۇرلاعان. ولاردىڭ ءارقايسىسى ءوزىنىڭ اتقاراتىن ءرولىن ءبولىپ الىپ، جوسپارلى تۇردە ۇرلاعان جىلقىنى سويىپ، ەتىن بازارعا وتكىزىپ وتىرعان. ولاردان مالدى تاسىمالداعان «گازەل» كولىگى مەن 2 جىلقى تاركىلەنگەن. قازىرگى تاڭدا كۇدىكتىلەر قاماۋعا الىندى. ولارعا قاتىستى ق ر ق ك 188-1-بابى «مال ۇرلىعى» بويىنشا سوتقا دەيىنگى تەرگەۋ امالدارى جۇرگىزىلىپ جاتىر.

سونىمەن قاتار، ءدال وسىعان ۇقساس مال ۇرلىعىن جاساپ كەلگەن تاعى ءبىر ۇيىمداسقان قىلمىستىق توپ ارىس اۋدانىندا قولعا ءتۇستى.

«بۇل توپتىڭ ۇيىمداستىرۋشىسى ءوزىنىڭ 2 سىبايلاسىمەن بىرگە جايىلىمعا بارىپ، جىلقىنى اتىپ الىپ وتىرعان. سول جەردە سويىپ، ەتىن «ب م ۆ» ماركالى كولىكتەرىنە سالىپ الىپ كەتكەن. سوسىن ونى اقشاعا ساتقان. تەكسەرۋ كەزىندە ۇستالعان 3 كۇدىكتى دە بۇرىن وسىنداي قىلمىسى ءۇشىن سوتتى بولعانى انىقتالدى. سونداي- اق، كۇدىكتىلەردەن جىلقى ەتىن ساتىپ العان 2 ەر ادام قولعا ءتۇستى»، - دەدى قۇرمانبەك ساحوۆ.

كۇدىكتىلەردىڭ ءبىرى شىمكەنت قالاسىنىڭ، ەكىنشىسى تۇركىستان وبلىسىنىڭ سايرام اۋدانىنىڭ تۇرعىندارى. ۇيىمداسقان قىلمىستىق توپ مۇشەلەرى جالپى 19 جىلقىنى ۇرلاپ، مال يەلەرىنە 7,6 ميلليون تەڭگە شىعىن كەلتىرگەن. اتالعان توپ مۇشەلەرىنەن «ب م ۆ» ماركالى جەڭىل كولىك پەن 16 كاليبرلى اڭشى مىلتىعى تاركىلەندى. بۇگىندە بۇل توپ مۇشەلەرى دە قاماۋعا الىندى. سوتقا دەيىنگى تەرگەۋ امالدارى جۇرگىزىلىپ جاتىر.


:ءبولىسۋ
سونداي-اق... وقىڭىز
پئكئر قالدئرؤ
+7
جئبةرؤ
ونلاين قىزمەتكەرلەر

مۇراعات