بالقاشتا ساۋىقتىرۋدان وتەتىن ەرەكشە بالالاردىڭ سانى 2 ەسە ارتادى
ق ر پرەمەر-ءمينيسترى اسقار ءماميننىڭ سەنات وكىلدەرىنىڭ دەپۋتاتتىق ساۋالىنا بەرگەن جاۋابىندا وسىنداي مالىمەت ايتىلعان.
«بالالاردىڭ بارلىق ساناتتارىنا ارنالعان ساۋىقتىرۋ جانە دەمالىس شارالارىن رەسپۋبليكالىق دەڭگەيدە «بالداۋرەن» رەسپۋبليكالىق وقۋ-ساۋىقتىرۋ ورتالىعى ۇيىمداستىردى. ورتالىقتا جانە ونىڭ فيليالدارىندا جىل سايىن 16 اۋىسىمدا 15498 بالا ساۋىقتىرۋدان وتەدى. ونىڭ ىشىندە 4765 بالا جازعى كەزەڭدە، 10773 بالا وقۋ جىلىنىڭ ۋاقىتىندا (شۋچينسك قالاسىندا - 4608، قاپشاعاي قالاسىندا - 4250، تۇركىستان وبلىسىندا - 4160، بالقاش قالاسىندا - 2480) ورتالىقتا بولادى»، - دەپ جاۋاپ بەردى اسقار مامين دەپۋتاتتاردىڭ ساۋالىنا.
سونداي-اق، ول «ءبىلىم تۋرالى» قازاقستان رەسپۋبليكاسى زاڭ بويىنشا، جولدامالاردىڭ كەپىلدىك بەرىلگەن كۆوتاسى جەتىم بالالارعا، اتا-اناسىنىڭ قامقورلىعىنسىز قالعان بالالارعا، كوپ بالالى، از قامتىلعان وتباسىلاردان شىققان بالالارعا، قازاقستاننىڭ ەكولوگيالىق قولايسىز وڭىرلەرىنەن شىققان بالالارعا، مۇگەدەك بالالاردى تاربيەلەپ وتىرعان وتباسىلاردان شىققان بالالارعا، تولىق ەمەس وتباسىلاردان شىققان بالالارعا (%20-3100 ورىن)، كوركەمونەر مەكتەپتەرىنىڭ شاكىرتتەرىنە (%10-1150)، شىعارماشىلىق باعىتتاعى بالالارعا (%10- 1150)، اۋىلدى مەكەندەردىڭ وقۋشىلارىنا (%5-775)، دارىندى بالالارعا (%55-9323) ۇسىنىلاتىنىن اتاعان.
«2021-جىلعا ارنالعان رەسپۋبليكالىق بيۋدجەتتە جانە 2022-2024-جىلدارعا ارنالعان رەسپۋبليكالىق بيۋجەت جوباسىندا بالالاردى، ونىڭ ىشىندە ەرەكشە ءبىلىم بەرىلۋىنە قاجەتتىلىگى بار بالالاردى (جىل سايىن 18236 بالا) ساۋىقتىرۋ، وڭالتۋ جانە ولاردىڭ دەمالىسىن ۇيىمداستىرۋ ءۇشىن «بالداۋرەن» ورتالىعى، «بوبەك» ۇلتتىق عىلىمي-پراكتيكالىق، ءبىلىم بەرۋ جانە ساۋىقتىرۋ ورتالىعى، «تۇزەتۋ پەداگوگيكاسى ورتالىعى» 4375994 مىڭ تەڭگە كوزدەلگەن. ەرەكشە ءبىلىم بەرۋگە مۇقتاجدىعى بار بار بالالارعا ورتالىقتىڭ بالقاشتاعى فيليالىندا ساۋىقتىرۋ جانە وڭالتۋ ۇيىمداستىرىلدى. وندا جىل سايىن 880 ورىن قاراستىرىلعان. ساۋىقتىرۋدىڭ وسى تۇرىمەن جىل سايىن قامتىلاتىن بالالاردىڭ سانىن 2 ەسە ۇلعايتۋ (1600 بالا) ماسەلەسى پىسىقتالۋدا»، - دەپ جازىلعان جاۋاپتا.
اسقار ءماميننىڭ ايتۋىنا قاراعاندا، قازاقستان بويىنشا ەرەكشە ءبىلىم بەرۋدى قاجەت ەتەتىن 161826 بالا بار.
«ولاردى وڭالتۋمەن دەنساۋلىق ساقتاۋ جۇيەسىنىڭ 36 وڭالتۋ ورتالىعى اينالىسادى. ونىڭ ىشىندە 3 رەسپۋبليكالىق جانە 33 وڭىرلىك مەكەمە بار. بيىل ءبىرىنشى جارتىجىلدىقتا ەرەكشە ءبىلىم بەرۋ مۇقتاجدىعى بار 31671 بالا مەديتسينالىق وڭالتۋدان ءوتتى»، - دەپ جازادى ۇكىمەت باسشىسى.