اتىراۋدا 2 جاسار بالا كوروناۆيرۋستان جازىلىپ كەتتى

قازاقپارات - اتىراۋدا 2 جاسار بالا كورورناۆيرۋس ينفەكتسياسىنان جازىلىپ شىقتى، دەپ حابارلايدى قازاقپارات.

ەمدەۋشى دارىگەر نازەركە تولەتايەۆانىڭ ايتۋىنشا، بالا بۇعان دەيىن سال اۋرۋى (د ت س پ)، جۇيكە جۇيەسىنىڭ اتروفياسى، ميكروتسەفاليا دياگنوزىمەن ەسەپتە تۇرعان.

«ناۋقاس 26-تامىزدا دەنە قىزۋىنىڭ كوتەرىلۋىنە بايلانىستى وبلىستىق بالالار اۋرۋحاناسىنا ءتۇستى. كومپيۋتەرلىك توموگرافيانىڭ ناتيجەسىمەن بالانىڭ وكپەسىنىڭ 12 پايىزى زاقىمدالعانى انىقتالدى. سول سەبەپتەن، ول №2 وبلىستىق اۋرۋحاناعا جاتقىزىلدى»- دەيدى نازەركە تولەتايەۆا.

ناۋقاس بالادا قۇرىسۋدىڭ ايقىن بەلگىلەرى بولعان. ول 31-تامىزدان 3-قىركۇيەككە دەيىن جانساقتاۋ بولىمىندە ەمدەلگەن.

قازىر 2 جاسار بالا ءتيىستى ەم- شارالاردان كەيىن كوروناۆيرۋس ينفەكسياسىنان تولىق جازىلىپ شىققان.

ەسكە سالا كەتەلىك، بۇعان دەيىن اتىراۋدا كوروناۆيرۋس جۇقتىرعان 2 جاسار بالا جانساقتاۋ بولىمىندە جاتقانىن جازعان ەدىك.