التاي كولگىنوۆ ۆاكسينا الاتىندار اراسىندا ۇتىسقا 2 بولمەلى پاتەر تىكتى

None
None
نۇر- سۇلتان. قازاقپارات - ەلوردا تۇرعىندارى ۆاكسينا الۋ ارقىلى 2 بولمەلى پاتەر ۇتىپ الۋى مۇمكىن.

مۇنداي جاڭالىقپەن نۇر- سۇلتان قالاسىنىڭ اكىمى التاي كولگىنوۆ Instagram پاراقشاسىندا ءبولىستى، دەپ حابارلايدى قازاقپارات ءتىلشىسى.

«كوروناۆيرۋستىڭ تارالۋىن بولدىرماۋ جانە ۆاكسيناتسيا جۇرگىزۋ بويىنشا شتاب وتىرىسىن وتكىزدىم. ءوز ورىنباسارلارىما، باسقارما باسشىلارىنا جانە اۋدان اكىمدەرىنە جەتەكشىلىك ەتەتىن سالالاردا ۆاكسيناتسيالاۋدىڭ ماڭىزدىلىعى مەن قاجەتتىلىگىن جوعارى دەڭگەيدە ءتۇسىندىرۋ ءۇشىن جەكەلەگەن جاۋاپكەرشىلىك جۇكتەلدى. ۇجىمدىق يممۋنيتەتتى قالىپتاستىرۋ ءۇشىن قالا حالقىنىڭ 60 پايىزدان استامى ۆاكسيناتسيالانۋى قاجەت. سانيتارلىق دارىگەرلەر كارانتيندىك قوسىمشا شەكتەۋلەر تۋرالى جاڭا قاۋلى دايىنداۋدا: قاۋىپ- قاتەر توبى ءۇشىن ۆاكسيناتسيا مىندەتتى، ۆاكسيناتسيالانباعان قىزمەتكەرلەردى قاشىقتان جۇمىس ىستەۋ رەجيمىنە كوشىرۋ جانە تاعى باسقا تالاپ ەتىلەدى. قالا تۇرعىندارىن ىنتالاندىرۋ ءۇشىن باعالى سىيلىقتاردىڭ ۇتىس ويىنىن ەنگىزىپ جاتىرمىز. ال جاڭادان ۆاكسيناتسيالانعاندار اراسىندا ەكى بولمەلى پاتەر ويناتپاقپىز (ينۆەستورلار ەسەبىنەن). ۇتىس ويىنىنا قالا ەمحانالارىندا نەمەسە س و و/س ۇ پۋنكتتەرىندە ەكپە العان قالا تۇرعىندارىنىڭ ءبارى قاتىسا الادى» ، - دەدى قالا باسشىسى.

ونىڭ اتاپ وتۋىنشە. پاتەر ۇتىسىنىڭ ويىنىنا وسى جىلدىڭ 25 -ماۋسىمى مەن 31 -تامىزى ارالىعىندا ۆاكسينانىڭ ءبىرىنشى كومپونەنتىن الاتىن 18 جاستان اسقان قالا تۇرعىندارى قاتىسا الادى. قىركۇيەك ايىنىڭ باسىندا ناتيجەسى جاريالانادى.

«كونكۋرستىڭ ءادىل ءوتۋى جانە ۆاكسيناتسيالانعانداردى تولىعىمەن قامتۋ ءۇشىن (كورسەتىلگەن كەزەڭدە) IT- قوعامداستىقتى جۇمىلدىرامىز. ايتا كەتەيىن، بۇعان دەيىن «MEGA Silk Way» س و و ۆاكتسينالانعاندار اراسىندا اۆتوكولىك ۇتىس ويىنى وتەتىنىن حابارلاعان. سول سياقتى س و و/س ۇ پۋنكتتەرىندە ۆاكتسيناتسيالانعاندار اراسىندا كومپيۋتەرلىك جانە تۇرمىستىق تەحنيكالاردىڭ، iPhone سمارتفونىنىڭ ۇتىس ويىندارى ويناتىلادى. سوڭعى كۇندەرى تۇرعىنداردىڭ ۆاكسينا الۋداعى بەلسەندىلىگى قۋانتادى. قالا تۇرعىندارى وسىلايشا ءوز دەنساۋلىعىنا جاۋاپكەرشىلىكپەن قاراي باستادى ءارى «دەلتا» شتاممىنىڭ قاۋپىن ءتۇسىندى. ۆاكسيناتسيا - پاندەميامەن كۇرەستەگى جالعىز، ءتيىمدى ءادىس!»، - دەدى التاي كولگىنوۆ.

سوڭعى جاڭالىقتار