پەتروپاۆلدا كوپ قاباتتى ۇيدە گاز بالونى جارىلىپ، 2 ادام مەرت بولدى

پەتروپاۆل. قازاقپارات - پەتروپاۆلدا بەس قاباتتى ۇيدە گاز بالونى جارىلىپ، ەكى ادام وقيعا ورنىندا كوز جۇمدى، دەپ حابارلايدى قازاقپارات ءتىلشىسى.

سولتۇستىك قازاقستان وبلىسى توتەنشە جاعدايلار دەپارتامەنتى باسپا ءسوز قىزمەتىنىڭ مالىمەتىنشە، كەشە ساعات 15:59 مينۋتتا «101» نومىرىنە پەتروپاۆلداعى ينتەرناتسيونال كوشەسى 21 ءۇيدىڭ ءبىرىنشى قاباتىندا گاز باللونى جارىلعاندىعى جونىندە جانە ونىڭ ارتىنان ءورتتىڭ باستالعانى تۋرالى حابار تۇسەدى.

«وقيعا ورنىنا كەلگەندە ءبىرىنشى قاباتتان شىعىپ جاتقان قاتتى ءتۇتىندى كوردىك. بۇل جەردە بىرنەشە كاسىپكەرلىك سۋبەكتىسى: بىرنەشە ءدامحانا مەن شاشتاراز ورنالاسقان. گاز بالونى ءدامحانالاردىڭ بىرىندە جارىلعان. كەلە سالا ءۇش ادامدى قاۋىپسىز جەرگە شىعاردىق، ءبىراق ولاردىڭ ەكەۋى كوز جۇمدى»، - دەدى س ق و ت ج د باستىعى راميل كامالوۆ.

بۇرىن جاتاقحانا بولعان، كەيىن جەكەشەلەندىرىلگەن كوپ قاباتتى ۇيدەن 120 عا جۋىق ادام ەۆاكۋاتسيالاندى. قازىر وقيعا ورنىندا وبلىس ورتالىعىنىڭ بارلىق ءورت ءسوندىرۋ بولىمدەرى جۇمىلدىرىلعان.

«وقيعا بولعان جەر پوليتسەيلەرمەن تولىق قورشاۋعا الىندى. اۋا رايىنا بايلانىستى اۆتوبۋستاردى الدىرىپ، ادامداردى جاقىن ماڭداعى 2№ ورتا مەكتەپكە ورنالاستىردىق. قازىرگى ۋاقىتتا ءۇيىندىنىڭ استىندا قالعاندار ىزدەستىرىلىپ جاتىر. قاتتى ءتۇتىن مامانداردىڭ جۇمىسىن قيىنداتقان»، - دەيدى راميل كامالوۆ.

اپات سالدارىنان 2 ادام قازا تاپتى. ساعات 18:42 دە ءۇيىندى استىنان ايەل ادامنىڭ دەنەسى شىعارىلدى.