قاراعاندىداعى ۆاكسينا ءوندىرۋ كولەمى 2 ميلليون دوزاعا دەيىن جەتكىزىلمەك
بۇل تۋرالى و ك ق وتكەن باسپا ءسوز ءماسليحاتىندا دەنساۋلىق ساقتاۋ ءبىرىنشى ۆيتسە- ءمينيسترى مارات شورانوۆ ايتتى، دەپ حابارلايدى قازاقپارات ءتىلشىسى.
ونىڭ ايتۋىنشا، اتالعان پارتيانى قازاقستان اۋماعىنا اكەلۋ تۋرالى رەسەي تاراپىمەن ءتيىستى كەلىسىمدەر بار.
«15- اقپاننان باستاپ قاراعاندى فارماتسيەۆتيكالىق كەشەنى ءوندىرىسىنىڭ «سپۋتنيك V « تىركەلەدى. قازىردىڭ وزىندە 90 مىڭ دوزا كولەمىندەگى ءبىرىنشى پارتيانىڭ ءوندىرىسى باستالدى. ول 26 - اقپاننان باستاپ ءبىرىڭعاي ديستريبيۋتوردىڭ قويمالارىنا جانە ودان ءارى وڭىرلەرگە جونەلتۋگە قولجەتىمدى بولادى. كەيىننەن شىلدە ايىنا دەيىن ءوندىرىس كولەمى 2 ميلليون دوزاعا دەيىن جەتكىزىلەدى»، - دەدى ءبىرىنشى ۆيتسە- مينيستر.
الدىن الا مالىمەتتەر بويىنشا، بۇل ۆاكسينانىڭ تيىمدىلىگى شامامەن % 92 قۇرايدى. ەسكە سالا كەتسەك بۇعان دەيىن مارات شورانوۆ ۆاكسيناتسيا جۇرگىزەر الدىندا دەنە تەمپەراتۋراسى ولشەنىپ، ەپيدەميولوگيالىق انامنەزدى جيناۋ، ساتۋراتسيانى، جۇرەك جيىرىلۋىنىڭ جيىلىگىن، ارتەريالىق قىسىمدى ولشەۋ، تىنىس الۋ جانە جۇرەك- قانتامىر جۇيەسىن اۋسكۋلتاتسيالاۋ جانە جۇتقىنشاقتى تەكسەرۋ شارالارى جاسالاتىنىن ايتقان ەدى. ەگەر تەمپەراتۋرا °C 37 - تان اسسا، ۆاكسيناتسيا كەيىنگە قالدىرىلادى.
اۆتور: ايان بەكەن ۇلى