ەلىمىزدە كۇن سايىن 2 ايەل جاتىر موينى قاتەرلى ىسىگىنەن كوز جۇمادى

None
None
نۇر-سۇلتان. قازاقپارات - 2020-جىلى ەلىمىزدە 1830 ايەلدەن جاتىر موينى قاتەرلى ىسىگى انىقتالدى.

جىل سايىن 660 ايەل وسى دەرتتەن كوز جۇمادى. بۇل تۋرالى ق ر دەنساۋلىق ساقتاۋ مينيسترلىگىنىڭ باس ونكولوگ دارىگەرى، قازاق ۇلتتىق ونكولوگيا جانە راديولوگيا ينستيتۋتىنىڭ ديرەكتورى ديليارا قايداروۆا Instagram پاراقشاسىندا وتكەن تىكەلەي ەفيردە ايتتى، دەپ حابارلايدى قازاقپارات ءتىلشىسى.

«قاتەرلى ىسىك - ۇكىم ەمەس، ءبىراق قازىرگى ۋاقىتتا ساق ءجۇرۋىمىز كەرەك. ەلىمىزدە بۇل دەرتتى ەمدەۋدىڭ بارلىق ءادىس-ءتاسىلى بار. قىزدار وزدەرىن جاتىر موينىن الىپ تاستايتىن جاعدايعا جەتكىزبەسە ەكەن. شىمكەنتتە، تۇركىستان وبلىسىندا بولعان كەزدە كەيبىر ايەل گينكولوگقا 7 جىل، 9 جىل بارىپ كورمەگەنىن ايتتى. قاتەرلى ىسىك بەس جىل ىشىندە اسقىنادى، سوندىقتان وزدەرىڭىزگە كوڭىل بولىڭىزدەر. 23- قاڭتاردا ەلىمىزدىڭ ءارتۇرلى وڭىرىندە تەگىن تۇردە اشىق ەسىك كۇنى وتەدى. سوعان ۋاقىت تاۋىپ بارىڭىزدار. نۇر-سۇلتان مەن قاراعاندى «قىزىل ايماققا» كىرگەندىكتەن، ول جاقتا اشىق ەسىك كۇنى بولمايدى، ءبىراق كەز كەلگەن ۋاقىتتا ەمحاناعا بارىپ تەگىن تۇردە قارالا الاسىزدار»، - دەيدى باس ونكولوگ دارىگەر ديليارا قايداروۆا.

سونداي-اق، بۇل دەرت جاستارعا دا قاۋىپ توندىرەتىنىن ايتتى.

«جاتىر موينى قاتەرلى ىسىگىمەن اۋىراتىن 28 جاستاعى قىزدار دا بار. بۇل دەرتتىڭ شارىقتاۋ شەگى 40-44 جاس ارالىعى. 2020-جىلى ەلىمىزدە 1830 ايەلدەن جاتىر موينى قاتەرلى ىسىگى انىقتالدى. جىل سايىن 660 ايەل وسى دەرتتەن كوز جۇمادى، ياعني كۇنىنە ەكى ايەل جاتىر موينى قاتەرلى ىسىگى سالدارىنان كوز جۇمادى دەگەن ءسوز. بۇل ستاتيستيكا كوڭىل قۋانتپايتىنى انىق، سول سەبەپتى ونكوگينەكولوگقا ۋاقىتىلى تەكسەرىلىپ تۇرىڭىزدار»، - دەيدى ول.

سوڭعى جاڭالىقتار