جەمقورلىق تۋرالى اقپارات بەرگەن اقتوبەلىكتەرگە 2 ميلليون تەڭگە سىياقى بەرىلدى
وڭىردە 11 ادام جەمقورلىق تۋرالى حابارلاپ، 2 ميلليون تەڭگە كولەمىندە ءبىرجولعى سىياقى الدى، دەپ حابارلايدى قازاقپارات ءتىلشىسى.
اقتوبە وبلىستىق سىبايلاس جەمقورلىققا قارسى قىزمەت دەپارتامەنتىنىڭ باسشىسى باۋىرجان بالعابەكوۆ وتكەن جىلدى قورىتىندىلادى. وڭىردە 53 قىلمىستىق ءىس تىركەلگەن. ونىڭ 33 ءى اۋىر قىلمىس ساناتىنا جاتادى. 28 قىلمىس قارجىنى جىمقىرۋ، 5 ءۋى لاۋازىمدىق وكىلەتتىلىگىن تەرىس پايدالانۋ جانە 18 ءى پاراقورلىق.
دەپارتامەنتتىڭ حابارلاۋىنشا، اقتوبە قالاسى اكىمىنىڭ ورىنباسارى، اقتوبە قالاسىنىڭ ت ك ش ءبولىمىنىڭ باسشىسى، «اقتوبە قالاسىن ءتيىمدى دامىتۋ ورتالىعى» ك م م باسشىسى ءىستى بولىپ، اۋداندىق دەڭگەيدەگى ءبىرقاتار جەرگىلىكتى اتقارۋشى ورگانداردىڭ باسشىلارى تىزىمدە بار. مەملەكەتتىك باعدارلامالاردى جۇزەگە اسىرۋ كەزىندە كوپتەگەن قىلمىس تىركەلگەن.
ولاردىڭ التاۋى «ناتيجەلى جۇمىسپەن قامتۋدى جانە جاپپاي كاسىپكەرلىكتى دامىتۋ»، بەسەۋى «وڭىرلەردى دامىتۋ»، تورتەۋى «نۇرلى جول»، ۇشەۋى «ءبىلىم مەن عىلىمدى دامىتۋ» جانە ەكەۋى «جۇمىسپەن قامتۋدىڭ جول كارتاسى» باعدارلامارىنا تيەسىلى. قىلمىستىق ىستەر بويىنشا كەلتىرىلگەن زالال كولەمى 240,8 ميلليون تەڭگەنى قۇراپ وتىر، ونىڭ 201 ميلليون تەڭگەسى وتەلدى. سونىمەن بىرگە جەمقورلىق تۋرالى حابارلاعان 11 ادامعا 2 ميلليون تەڭگە سىياقى بەرىلدى. «جەدەل-تەرگەۋ باعىتىندا جۇرگىزىلىپ جاتقان جۇمىستارىمىزعا قاراماستان، جەمقورلىقتىڭ ءتيىمدى الدىن الۋ مەن اۋقىمدى اعارتۋ ءىسى ءبىزدىڭ قىزمەتتەگى باسىم باعىت بولىپ تابىلادى»، - دەپ اتاپ ءوتتى باۋىرجان بالعابەكوۆ.
ايتا كەتەيىك، دەپارتامەنت بيۋجەت قارجىسىن يگەرۋ كەزىندەگى زاڭدىلىقتى دا نازاردا ۇستايدى. مونيتورينگ كەزىندە 25 مەملەكەتتىك ورگان مەن كۆازيمەملەكەتتىك سەكتور سۋبەكتىلەرىندە جالپى سوماسى 437,1 ميلليون تەڭگەنى قۇرايتىن تاۋارلار مەن كورسەتىلەتىن قىزمەتتەردىڭ باعاسىن نەگىزسىز كوتەرۋ فاكتىسى انىقتالعان.