جانۋارلارعا قاتىگەزدىك جاساعانداردىڭ باس بوستاندىعى 2 جىلعا شەكتەلۋى مۇمكىن

None
None
نۇر- سۇلتان. قازاقپارات - قازاقستاندا جانۋارلارعا قاتىگەزدىك كورسەتكەن ادامداردىڭ 2 جىلعا دەيىن باس بوستاندىعى شەكتەلۋى مۇمكىن.

بۇل تۋرالى بۇگىن ورتالىق كوممۋنيكاتسيالار قىزمەتىندە وتكەن بريفينگتە ەكولوگيا، گەولوگيا جانە تابيعي رەسۋرستار ءمينيسترى ماعزۇم مىرزاعاليەۆ ايتتى، دەپ حابارلايدى قازاقپارات ءتىلشىسى.

«ادامدار تاراپىنان جانۋارلارعا نە ءۇشىن قاتىگەزدىك جاسالاتىنى تۇسىنىكسىز. بۇل اقتاۋعا كەلمەيدى. كۇن سايىن الەۋمەتتىك جەلىلەردە اقىلعا سىيمايتىن ارەكەتتەر جاريالانىپ جاتادى. اققۋدى تۇنشىقتىرىپ، يتبالىقتى ۇرىپ، ءيتتى قورلاپ جاتقانىن كوردىك. بۇعان ۇقساس فاكتىلەر كوپ. سوندىقتان جازانى كۇشەيتۋ قاجەت»، - دەدى ماعزۇم مىرزاعاليەۆ و ك ق- دا وتكەن باسپا ءسوز ءماسليحاتىندا.

مينيستر اتاپ وتكەندەي، سوندىقتان بۇگىندە قىلمىستىق كودەكستىڭ 316-بابى («جانۋارلارعا قاتىگەزدىك جاساۋ») بويىنشا جازانى كۇشەيتۋ ۇسىنىلىپ وتىر.

«ايىپپۇل ۇلعايادى، ءتىپتى باس بوستاندىعىن شەكتەۋ جازاسى ەنگىزىلۋى مۇمكىن. زاڭ جوباسى جاقىندا ماجىلىسكە جولداندى. بۇدان بولەك دەپۋتاتتارمەن، جانۋارلاردى قورعاۋشىلارمەن بىرگە جانۋارلاردى قورعاۋ تۋرالى زاڭ جوباسى ازىرلەندى. ونىڭ جۇزەگە اسۋى جانۋارلارعا ادامگەرشىلىكپەن، جاۋاپكەرشىلىكپەن قاراۋدى قامتاماسىز ەتەدى. ءتۇرلى ساناتتاعى جانۋارلارعا قاراۋ بويىنشا جالپى جانە ارنايى تالاپتار بەكىتىلەدى. سونىمەن بىرگە جانۋارلارعا جاسالعان كەز كەلگەن قاتىگەزدىك ارەكەتكە قاتىستى جاۋاپكەرشىلىك ىلەسپە زاڭدا قاراستىرىلعان»، - دەدى مينيستر.

اتاپ وتەرلىگى، جاڭا قۇجاتتا جابايى، ءۇي، قىزمەتتىك جانە اۋىل شارۋاشىلىعى جانۋارلارىنا جاسالاتىن قاتىگەزدىكتىڭ الدىن الۋ شارالارى تولىق قارالعان. جانۋارلارعا ۆەتەرينارلىق كومەك، ءتيىستى كۇتىم جاساۋ، ويىن- ساۋىقتىق ماقساتتا پايدالانۋ ەرەجەلەرى بەكىتىلگەن. ال جانۋارلارعا قاتىگەزدىكتى ناسيحاتتاۋعا تىيىم سالىنعان.

اۆتور: ايان بەكەن ۇلى


سوڭعى جاڭالىقتار