وزبەكستاندا 2 مىڭنان استام مەملەكەتتىك كاسىپورىن جەدەلدەتىلگەن تۇردە جەكەشەلەندىرىلەدى
«قازاقپارات» ح ا ا بۇل تۋرالى ءو ز ا- عا سىلتەمە جاساپ حابارلايدى.
وزبەكستان پرەزيدەنتى شاۆكات ميرزيەيەۆ 27- قازان كۇنى مەملەكەتتىك اكتيۆتەردى جەدەلدەتىلگەن تۇردە جەكەشەلەندىرۋ بويىنشا جارلىققا قول قويدى. جارلىقتا كورسەتىلگەن شارالارمەن 2 مىڭنان استام مەملەكەتتىك اكتيۆ قامتىلادى. ولاردىڭ ىشىندە 479 كاسىپورىن مەن 15 جىلجىمايتىن مۇلىك نىسانىن ساۋدا-ساتتىققا شىعارۋ كوزدەلگەن. 62 كاسىپورىن جەكەشەلەندىرۋگە دايىندالادى. 32 كاسىپورىن مەن سالا ترانسفورماتسيالانسا، 507 بازاردىڭ قىزمەتى جەتىلدىرىلەتىن بولادى.
ونىمەن قوسا، بۇعان دەيىنگى اكتىلەردە كورسەتىلگەن 386 نىسان، سونداي-اق حوكيمدەر ىسكە اسىرۋعا قۇزىرەتتى 559 نىسان ساۋدا-ساتتىققا شىعارىلادى.
«كۋكون نەفتگاز پارمالاش يشلاري» جانە «حورازمسۋۆكۋريليش» سىندى 62 ءىرى كاسىپورىندى جەكەشەلەندىرۋ ماسەلەسىندە، ولاردىڭ ينۆەستيتسيالىق تارتىمدىلىعىن ارتتىرۋ ماڭىزدىلىعى اتاپ ءوتىلدى.
سونداي-اق مەملەكەتتىك جوبالاۋ ينستيتۋتتارىن ترانسفورماتسيالاۋ ماسەلەسى قوزعالدى. ەلدە ءىرى قۇرىلىس كومپانيالارىنىڭ سانى ارتىپ كەلەدى. قۇرىلىس كومپانيالارى مەن مەملەكەتتىك جوبالاۋ ينستيتۋتتارىنىڭ تىعىز كووپەراتسياسى ەسەبىنەن جوبالاردىڭ ساپاسى مەن باسقارۋ جۇيەسىن جاقسارتۋ مىندەتى قويىلدى.
جاڭا جۇيە ەڭ الدىمەن، 6 جوبالاۋ ينستيتۋتىندا ەنگىزىلەتىن بولادى. كەيىننەن جوبالاۋ ينستيتۋتتارىنداعى مەملەكەتتىڭ قاتىسۋى قۇرىلىستاعى سەرىكتەس-ۇيىمداردا ىسكە اسىرىلماق. بۇدان بولەك، كەڭەس بارىسىندا 500 دەن استام بازار مەن ساۋدا كەشەندەرىنە مەملەكەتتىڭ قاتىسۋىن تۇبەگەيلى قايتا قاراۋ قاجەتتىگى ايتىلدى.
بۇل ءۇشىن ينۆەستورلار اراسىندا كونكۋرس جاريالانادى. ەگەر بازار تابىسى ءوسىپ، سالىقتىق تۇسىمدەر مەن جۇمىس ورىندارىنىڭ سانى تۇراقتى تۇردە ارتاتىن بولسا، وندا كاسىپكەر مەملەكەتتىك ۇلەستى ءبولىپ تولەۋ شارتىمەن ساتىپ الا الادى.