قازاقستان مەن تۇركيا اسكەري سالادا 2 حاتتاما دايىنداپ جاتىر

None
None
نۇر- سۇلتان. قازاقپارات - قازاقستان مەن تۇركيا قورعانىس مينيسترلىكتەرى اسكەري تاريف جانە مالىمەتتەر الماسۋ سالالارىندا ەكى حاتتاما دايىنداپ جاتىر. بۇل تۋرالى ق ر قورعانىس ءمينيسترى نۇرلان ەرمەكبايەۆ ايتتى، دەپ حابارلايدى قازاقپارات ءتىلشىسى.

«بۇگىن تۇركيا قورعانىس ءمينيسترى حۋلۋسي اكار قورعانىس ۆەدومستۆوسىنىڭ باسشىسى رەتىندە قازاقستانعا العاش رەت رەسمي ساپارمەن كەلىپ وتىر. وزدەرىڭىز بىلەتىندەي، تۇركيا ءبىزدىڭ ستراتەگيالىق ارىپتەسىمىز سانالادى. ءبىزدىڭ ستراتەگيالىق ارىپتەستىكتىڭ بەرىك نەگىزىن ەڭ الدىمەن ەكى مەملەكەت باسشىلارىنىڭ وتە جاقىن، سەنىمدى ءارى دوستىق قارىم- قاتىناسى قالاپ وتىر. 2018 -جىلعى قىركۇيەكتە ق ر تۇڭعىش پرەزيدەنتى - ەلباسى نۇرسۇلتان نازاربايەۆتىڭ تۇركياعا رەسمي ساپارى بارىسىندا ماڭىزدى قۇجاتتارعا قول قويىلدى. ول - اسكەري ىنتىماقتاستىق جونىندەگى كەلىسىم جانە قۇپيا مالىمەتتەردى ساقتاۋ جونىندەگى كەلىسىم. ال ەندى قۇقىقتىق بازانى نىعايتۋ باعىتىندا اسكەري تاريف جانە مالىمەتتەر الماسۋ سالالارىندا تاعى ەكى حاتتاما دايىندالىپ جاتىر»، - دەدى نۇرلان ەرمەكبايەۆ تۇرىك ارىپتەسىمەن كەزدەسۋدەن كەيىنگى بريفينگتە.


ق ر قورعانىس ءمينيسترى، تۇرىك ارىپتەسىمەن جۇزدەسۋ بارىسىنا ەكى ەلدىڭ اراسىنداعى ىنتىماقتاستىقتىڭ باسىم باعىتتارى ايقىندالعانىن ايتتى.

«ونىڭ ىشىندە ەڭ الدىمەن بىرلەسكەن وقۋ- جاتتىعۋ، بىرلەسكەن اسكەري جانە جاۋىنگەرلىك دايارلىق، ەكىنشىدەن، اسكەري ءبىلىم بەرۋ ماسەلەسى بار. اتاپ ايتقاندا، تۇركيا بىزگە تاپشى ماماندىقتار بويىنشا اسكەري قىزمەتشىلەردى، مامانداردى دايىندايدى. ونىڭ ىشىندە گيدروگرافيا، اسكەري تەڭىز سالاسىندا جانە كيبەرقاۋىپسىزدىك سالاسىندا وتە ماڭىزدى جوعارى دەڭگەيدەگى مامانداردى دايىنداپ بەرەدى. ءبىز ءوز تاراپىمىزدان بىلتىر العاش رەت ۇلتتىق قورعانىس ۋنيۆەرسيتەتىمىزدە ءبىر توپ تۇرىك اسكەري قىزمەتشىنى دايىندادىق. مۇنداي ءوزارا ءتيىمدى، پايدالى ىنتىماقتاستىقتى دامىتاتىن بولامىز. ودان باسقا كەلەسى جىلعى جالپى جوسپارلاردى دا تالقىلادىق جانە اسكەري تەحنيكالىق سالاداعى باستى باسىمدىقتار مەن باعىتتار بويىنشا ءوزارا پىكىر الماستىق. ال ناقتى كەلىسسوز ءبىزدىڭ يندۋستريا جانە ينفراقۇرىلىمدىق دامۋ مينيسترلىگىمەن جۇرگىزىلەدى»، - دەدى ول.


تۇركيا قورعانىس ءمينيسترى دە كەزدەسۋ بارىسىندا تاراپتاردىڭ ەكى ەل اراسىنداعى اسكەري- تەحنيكالىق ىنتىماقتاستىقتى ودان ارى كەڭەيتۋ قاجەتتىلىگىنە كەلىسكەنىن ايتتى.

«ءبىز ەكى ەلدىڭ اراسىندا قورعانىس سالاسىنداعى ىنتىماقتاستىقتى ودان ارى كەڭەيتۋگە قاتىستى ماسەلەلەردى تالقىلادىق. پرەزيدەنتتەر دەڭگەيىندە ەلدەرىمىزدىڭ اراسىندا تىعىز ديالوگ پەن ىنتىماقتاستىق ورناعاندىقتان جۇمىسىمىز بارىنشا جەڭىل بولدى. ءبىز قول جەتكىزىلگەن ۋاعدالاستىقتارعا قاتىستى ماسەلەلەردى تالقىلادىق»، - دەدى حۋلۋسي اكار.

اۆتور: مارلان جيەمباي

سوڭعى جاڭالىقتار