اۋىت مۇقيبەك: پارلامەنت ماجىلىسىندە كەم دەگەندە 2 دەپۋتات قانداستاردىڭ قاتارىنان بولۋى كەرەك

None
None
نۇر- سۇلتان. قازاقپارات - قوعام قايراتكەرى، ق ر پرەزيدەنتى جانىنداعى ۇلتتىق قوعامدىق سەنىم كەڭەسىنىڭ مۇشەسى اۋىت مۇقيبەك الداعى پارلامەنت سايلاۋىنا قاتىستى پىكىر ءبىلدىردى، دەپ حابارلايدى قازاقپارات ءتىلشىسى.

«پارلامەنت سايلاۋى زاڭعا سايكەس ءوز ۋاقىتىندا وتكەلى جاتىر. بۇل - وتە جاقسى جاڭالىق. مۇنداي سايلاۋدىڭ كەزەكتەن تىس ءوتۋى حالىقتىڭ نارازىلىعىنا ۇشىراپ كەلگەنى بەلگىلى. ەندى Ⅶ شاقىرىلىمنان حالىقتىڭ كۇتىپ وتىرعان ءۇمىتى وتە زور. ماجىلىسكە قاتىستى قازىر حالىق كوپ شىن پىكىر ايتىپ جاتىر. سەبەپ، ونداعى جاسى ۇلعايىپ كەتكەن ادامدار كوپ. وزدەرىنىڭ جەكە كاسىپكەرلىگىن قورعاۋ ءۇشىن كەلگەندەر دە از ەمەس. ودان قالسا، قىزمەتتەن بوساعان ەكس- مەملەكەتتىك قىزمەتكەرلەردە پارلامەنتكە كەلىپ وتىرا قالادى. سودان بارىپ ءماجىلىستىڭ ساپاسى تومەندەپ، كەمەلدى زاڭ قابىلداۋعا اسەرىن تيگىزەدى. كەمەلدى زاڭ قابىلدانباعاندىقتان، ەكونوميكامىز الدىعا جىلجىماي تۇر. پاندەميا كەزىندە حالىق ساپاسىز زاڭداردىڭ كەسىرىنەن كوپ زيان تارتتى. سول سەبەپتى بۇل شاقىرىلىمعا جاڭا تۇلعالار مەن جاڭا كاسىبي ماماندار كوپ كەلۋى كەرەك»، - دەدى اۋىت مۇقيبەك قازاقپارات تىلشىسىنە تەلەفون ارقىلى بىلدىرگەن پىكىرىندە.

ۇلتتىق كەڭەس مۇشەسىنىڭ ايتۋىنشا، پارلامەنت ماجىلىسىنە الداعى ۋاقىتتا ەنەتىن وپپوزيتسيالىق پارتيالار - شىن مانىندەگى وپپوزيتسيالىق پارتيا بولۋى كەرەك.

«وپپوزيتسيا دەگەن قولدان جاسالماۋى ءتيىس. بىزدە وپپوزيتسيا دەسە بولدى - توڭكەرىس جاسايتىن، ءبۇلدىرىپ، مەملەكەتتىڭ باعىتىن باسقا جاققا الىپ كەتەتىن سياقتى بولىپ كورىنەدى. ولاي ەمەس! وپپوزيتسيا دەگەن ەركىن پىكىرلى ءارى ويىن اشىق ايتاتىن ادام دەگەن ءسوز. وپپوزيتسيا دا مامان بولۋى كەرەك. قۇدايعا شۇكىر، 30 جىلدىڭ ىشىندە ولار دا تاربيەلەندى، تاجىريبە جينادى. بەلگىلەنگەن رەگلامەنت پەن قابىلدانعان زاڭنان اسىپ ەشكىم دە جۇمىس جاسامايدى. بۇل - ءبىر. ەكىنشىدەن، ءماجىلىستىڭ قۇرامىندا كوپبالالى انالار، جاستار، ايەلدەر سەكىلدى الەۋمەتتىك توپتىڭ وكىلدەرى بولاتىن بولدى. بۇل دا جاعىمدى جاڭالىق. وسى جەردە جانە ءبىر ماڭىزدى الەۋمەتتىك توپ ەسكەرىلمەي جاتقان سەكىلدى. مۇنى ەلباسى ايتىپ ەدى. بۇل - شەتتەن كەلگەن اعايىنداردىڭ وكىلى. قانداستارعا بەلگىلى ءبىر دارەجەدە مۇمكىندىك بەرۋ كەرەك»، - دەپ اۋىت مۇقيبەك پرايمەريزگە قاتىسقانىن، تاجىريبە جيناپ، ساياسي ومىرگە ءتىپتى دە ىشكەرلەي ارالاسقانىن قۋانا اتاپ ءوتتى.

«پرايمەريزدە ەلەكتوراتى كوپ ادامدار داۋىستىڭ كوبىن الىپ كەتتى. ماسەلەن، رەكتورلار. بۇكىل مۇعالىمدەر، وقىتۋشىلار پارتيا مۇشەسى بولدى دا، جوعارى داۋىسقا ج و و باسشىلارى يە بولدى. ەكىنشىدەن كاسىپكەرلەر مەن باس دارىگەرلەر. ولاردىڭ دا قول استىنداعى قىزمەتكەرلەرى كوپ. شەتتەن كەلگەن اعايىنداردىڭ ەلەكتوراتى جوقتىڭ قاسى. ولاردىڭ كوبى پارتياعا مۇشە ەمەس. وتە از. سوعان قاراماستان 2-3 مىڭعا دەيىن داۋىس جيناعان قانداستارىمىز بار. وسى سايلاۋدا سولاردىڭ ءۇنى ەسكەرىلسە دەگەن ۇمىتتەمىن. سەبەبى كوشى- قون - ەلباسىنىڭ ساياساتى. ول ەشقاشان توقتامايدى. ونىڭ، كەرەك دەسەڭىز، ەكىنشى التىن ءداۋىرى باستالايىن دەپ تۇر. پاندەميا توقتاپ، كورشى ەلدەردەگى ساياسي جاعدايلار تۇراقتالسا، شەكارا اشىلسا، قازاقستانعا لاپ ەتىپ ميلليونداعان قازاق كەلگەلى تۇر»، - دەدى قوعام قايراتكەرى.

اۋىت مۇقيبەك 30 جىلدان بەرى كوش قارقىنىنىڭ ءوز دەڭگەيىندە بولماۋىنىڭ ءبىر سەبەبىن زاڭنىڭ الا- قۇلالىعىنان كورەدى. ونىڭ ايتۋىنشا پارلامەنتتە سول ماسەلەنى بىلەتىن دەپۋتاتتار بولۋى ءتيىس.

«كوشتىڭ سايابىرلاعاننىڭ سىرتىندا، كەلىپ العان قانداستاردىڭ قۇجاتتانۋداعى كەدەرگىلەردەن كورگەن قيىندىعى دا از بولعان جوق. سوندىقتان كەم دەگەندە پارلامەنت ماجىلىسىندە 2 دەپۋتات قانداستاردىڭ قاتارىنان بولۋى كەرەك دەپ ەسەپتەيمىن. بۇل ءسوزسىز ەسكەرىلۋى كەرەك. الداعى سايلاۋدا وسى ماسەلە شەشىلسە ەكەن دەپ ۇمىتتەنەمىن»، - دەپ ءتۇيدى اۋىت مۇقيبەك.

ەسكە سالا كەتسەك بۇگىن مەملەكەت باسشىسى قاسىم- جومارت توقايەۆ ق ر پارلامەنتى ءماجىلىسى جانە ءماسليحات دەپۋتاتتارى سايلاۋىن تاعايىنداۋ تۋرالى ۇندەۋ جاريالاعان بولاتىن.

«بۇگىن مەن پارلامەنت ءماجىلىسى دەپۋتاتتارىنىڭ سايلاۋىن تاعايىنداۋ تۋرالى جارلىققا قول قويدىم. ورتالىق سايلاۋ كوميسسياسىنىڭ قاۋلىسىمەن بارلىق دەڭگەيدەگى ءماسليحات دەپۋتاتتارىنىڭ سايلاۋى تاعايىندالادى. الداعى سايلاۋ كونستيتۋتسيالىق مەرزىمگە سايكەس، 2021 -جىلدىڭ 10- قاڭتارىندا وتەدى. بارلىق ساياسي پارتيالاردىڭ بۇل سايلاۋ ناۋقانىنا قاتىسۋعا دايىندالۋىنا، سايلاۋ الدىنداعى پلاتفورماسىن ازىرلەۋىنە، پارتيالىق ينفراقۇرىلىمداردى جەتىلدىرۋىنە ۋاقىتى جەتكىلىكتى بولدى»، - دەدى پرەزيدەنت ۇندەۋىندە.

اۆتور: ايان بەكەن ۇلى

سوڭعى جاڭالىقتار