فۋتبولدان ەۋروپا ليگاسى: شيرەك فينالعا 2 كوماندا شىقتى
مۇنداي مارتەبە ۋكراينانىڭ «شاحتەر دونەتسك» جانە دانيانىڭ «كوپەنگاگەن» كوماندالارىنا بۇيىردى. ەكەۋى دە بۇگىن ءوز الاڭىندا قارسىلاستارىن جەڭدى ۋكراينانىڭ «شاحتەر دونەتسك» كلۋبى ءوز الاڭىندا گەرمانيانىڭ «ۆولفسبۋرگ» كومانداسىن قابىلدادى.
ەكەۋىنىڭ اراسىنداعى العاشقى كەزدەسۋدە ۋكرايندىق فۋتبولشىلار سىرت الاڭدا 2:1 ەسەبىمەن جەڭىسكە جەتتى. سوندىقتان ولار ءۇشىن بۇگىن تەڭ ەسەپتى ۇستاپ تۇرۋ جەتكىلىكتى ەدى.
ۋكرايندىق كلۋب كەزدەسۋ اياقتالار ساتتە قارسىلاستار قاقپاسىنا قاتارىنان ءۇش گول سوقتى. الدىمەن 89-مينۋتتا جۋنيور موراەس ەسەپ اشسا، 91-مينۋتتا مانور سولومون ەسەپتى ۇستەمەلەي ءتۇستى.
ال 93-مينۋتتا جۋنيور موراەس ەكىنشى گولىن سوعىپ قورىتىندى ەسەپتى بەلگىلەدى.
وسىلايشا «شاحتەر دونەتسك» قارسىلاسىن 3:0 ەسەبىمەن تىزە بۇكتىردى. ەندى ولار 11- تامىزدا «بازەل» (شۆەيتساريا) جانە «اينتراحت فرانكفۋرت» (گەرمانيا) جۇبىنىڭ جەڭىمپازىمەن كەزدەسەدى. تاعى ءبىر كەزدەسۋ دانيادا وتكىزىلدى. جەرگىلىكتى «كوپەنگاگەن» ءوز الاڭىندا تۇركيانىڭ «يستانبۋل باشاكشەحير» كومانداسىن قابىلدادى.
العاشقى كەزدەسۋدە تۇركيالىق فۋتبولشىلار 1:0 ەسەبىمەن جەڭىسكە جەتكەن بولاتىن. الاڭ يەلەرى قاتارىنان 4-مينۋتتا يوناس ۆيند ەسەپ اشتى. وسىلايشا قوس ويىننىڭ ناتيجەسى تەڭەستى. كەزدەسۋ تارتىستى ءوربي ءتۇستى. دانيالىقتار ودان كەيىن تاعى ەكى گول سوقتى.
يوناس ۆيند 53-مينۋتتا ەكىنشى گولدىڭ اۆتورى اتانسا، 62-مينۋتتا «كوپەنگاگەن» كلۋبىنىڭ تاعى ءبىر ويىنشىسى راسمۋس فالك ەسەپتى ۇستەمەلەي ءتۇستى.
ويىندا «كوپەنگاگەن» 3:0 ەسەبىمەن جەڭىسكە جەتتى. ەندى ولار 10- تامىزدا انگليانىڭ «مانچەستەر يۋنايتەد» جانە اۆستريانىڭ لاسك جۇبىنىڭ جەڭىمپازىمەن شەبەرلىك بايقاسادى. سونداي-اق، بۇگىن تاعى دا ەكى ويىن وتكىزىلەدى. ءوز الاڭىندا انگليانىڭ «مانچەستەر يۋنايتەد» كلۋبى اۆستريانىڭ لاسك، يتاليانىڭ «ينتەرى» يسپانيانىڭ «حەتافە» كوماندالارىن قابىلدايدى.
ەستەرىڭىزگە سالا كەتەلىك، كوروناۆيرۋس پاندەمياسى سالدارىنان اتالعان دوپ دوداسىنىڭ 1/8 فينالىنىڭ قارىمتا ويىندارى 12- ناۋرىزدان كەيىن بەلگىسىز مەرزىمگە كەيىنگە شەگەرىلگەن ەدى.
سول ويىندار، 5- تامىزدان باستاپ قايتا جالعاستى. جارىستىڭ شيرەك جانە جارتىلاي فينال ويىندارى گەرمانيانىڭ گەلزەنكيرحەن، دۋيسبۋرگ، ديۋسسەلدورف، كەلن قالالارىندا وتكىزىلەدى. ال فينال 21- تامىزدا كەلن قالاسىنداعى «رەين ەنەرگي» ستاديونىندا بولادى.