نۇر-سۇلتاندا قاتاڭ كارانتين شارالارى تاعى 2 اپتاعا سوزىلدى
قالا تۇرعىندارى جارلىقتا كورسەتىلگەن تالاپتاردى قاتاڭ ساقتاۋعا مىندەتتى، دەپ حابارلايدى قازاقپارات ءتىلشىسى.
«ويىن- ساۋىق، سپورتتىق جانە باسقا دا بۇقارالىق ءىس- شارالاردى، سونداي-اق وتباسىلىق، ەسكە الۋ، فورۋم، كونفەرەنسيا، سەمينار، جينالىس جانە باسقا دا جيىنداردى وتكىزۋگە تىيىم سالىنادى. سپورت جاتتىعۋىن تەك جەكە جانە اشىق اۋادا وتكىزۋگە بولادى. جەكە، 3 ادامنان نەمەسە ءبىر وتباسى مۇشەلەرىنەن باسقا تابيعاتقا ەكسكۋرسيا، كورپوراتيۆ، توپتىق سەرۋەن ۇيىمداستىرۋعا جانە رۇقسات ەتىلمەگەن جاعاجايلاردا شومىلۋعا تىيىم سالىنادى»، - دەلىنگەن قاۋلىدا.
سونداي-اق، 65 جاستان اسقان ادامداردىڭ قالادا جانە باسقا دا قوعامدىق ورىنداردا جۇرۋىنە شەكتەۋ قويىلادى.
«تۇرعىلىقتى جەرىنەن شىققان كەزدەن باستاپ ماسكا كيۋ بويىنشا مىندەتتى تالاپتاردى ساقتاۋ، 3 ادامعا دەيىن بىرگە سەرۋەندەۋ كەزىندە ادامدار اراسىندا كەمىندە 2 مەتر الەۋمەتتىك قاشىقتىقتى ساقتاۋ قاجەت. جۇمىسقا بارىپ- قايتۋعا، اۋلالاردا جانە ساياباقتا، الاڭدا، سكۆەرلەرگە، جاعالاۋعا بارىپ سەرۋەندەۋگە - جەكە، ال بىرگە قىدىرعاندا 3 ادامنان اسپايتىن توپتارعا رۇقسات ەتىلەدى. قوعامدىق ورىندارعا، سونىڭ ىشىندە قالالىق قوعامدىق كولىككە جانە ادام كوپ جينالاتىن وبەكتىلەرگە بارۋ كەزىندە ماسكا كيۋ جانە انتيسەپتيك پايدالانۋ جونىندەگى تالاپتاردى قاتاڭ ساقتاۋ كەرەك» دەلىنگەن قاۋلىدا.