شىعىس قازاقستاندا قاتاڭ كارانتين 2- تامىزعا دەيىن ۇزارتىلدى

نۇر-سۇلتان. قازاقپارات - شىعىس قازاقستاندا كوروناۆيرۋستىڭ ينفەكتسياسىنا قارسى قاتاڭ شەكتەۋ شارالارىنىڭ مەرزىمى ۇزارتىلدى، دەپ حابارلايدى قازاقپارات ءتىلشىسى.

بۇل تۋرالى ايماقتىڭ باس سانيتارلىق دارىگەرى مارات يسمايلوۆتىڭ جاڭا قاۋلىسىندا جاريالاندى.

«ش ق و اۋماعىندا بۇرىن بەكىتىلگەن قاتاڭ شەكتەۋ شارالارى 2020-جىلدىڭ 20- شىلدەسى ساعات 00.00-دەن 2020-جىلدىڭ 2- تامىزى ساعات 00.00 گە دەيىن ۇزارتىلسىن. شەكتەۋ شارالارىنىڭ رەجيمى مەن مەرزىمى وبلىس اۋماعىندا كوروناۆيرۋس ينفەكتسياسىنىڭ تارالۋى بويىنشا جاعدايدىڭ وزگەرۋىنە سايكەس وزگەرتىلۋى مۇمكىن»، - دەلىنگەن جەكسەنبىدە، جاريالانعان قاۋلىدا.

ش ق و باس سانيتارلىق دارىگەرى اياگوز، التاي قالاسىندا، كۇرشىم، كاتونقاراعاي، جارما، بەسقاراعاي، ءۇرجار اۋدانىنىڭ ورتالىعىنداعى قوسىمشا قاتاڭ شەكتەۋ شارالارىن 2020-جىلدىڭ 2- تامىزى ساعات 00.00 گە دەيىن ساقتاۋ تۋرالى قاۋلى شىعاردى.

«جەكە تۇلعالار جابىق نىسانداردى، قوعامدىق ورىندار مەن قوعامدىق كولىكتەردە بولعان كەزدە ماسكا كيىپ، الەۋمەتتىك قاشىقتىقتى ساقتاۋى ءتيىس»، - دەلىنگەن قۇجاتتا.

قاۋلى ەرەجەسىن جەكە تۇلعالار مەن زاڭدى تۇلعالار مىندەتتى تۇردە ساقتاۋى ءتيىس. اۋداندىق جانە قالالىق سانيتارلىق دارىگەرلەر كارانتين شارالارىن ەپيدەميولوگيالىق احۋالعا بايلانىستى قاتايتۋعا قۇقىعى بار.

قۇجات قول قويىلعان كۇننەن باستاپ كۇشىنە ەنەدى. رەسمي تۇردە الىنىپ تاستالعانعا دەيىن كۇشىندە بولادى.