كارانتين كەزىندە جەمقورلىقپەن كۇرەس قىزمەتىنە جۇگىنۋشىلەر سانى 2 ەسە ارتقان

نۇر-سۇلتان. قازاقپارات - كارانتين كەزىندە ەلىمىزدىڭ سىبايلاس جەمقورلىققا قارسى قىزمەتىنە جۇگىنۋشىلەر سانى ارتىپ كەتتى.

بۇل تۋرالى ق ر سىبايلاس جەمقورلىققا قارسى ءىس- قيمىل اگەنتتىگى قۇجات اينالىمى باسقارماسىنىڭ باسشىسى قۋانىش مىرزاعالي ايتتى، دەپ حابارلايدى قازاقپارات ءتىلشىسى.

«ق ر سىبايلاس جەمقورلىققا قارسى ءىس- قيمىل اگەنتتىگىنىڭ Call-ورتالىعى ازاماتتارعا تەگىن اقپاراتتىق قولداۋ كورسەتىپ، كەڭەس بەرەدى جانە ولاردىڭ شاعىمدارىن قابىلدايدى. جىل باسىنان بەرى Call-ورتالىققا شامامەن 12 مىڭ ءوتىنىم ءتۇستى. ونىڭ 400 دەن استامىندا قۇقىق بۇزۋ بەلگىلەرى بار. 44 ءىس سوتقا دەيىنگى تەرگەۋدىڭ ءبىرىڭعاي تىزىلىمىنە تىركەلىپ، 8 قىلمىستىق ءىس سوتقا جىبەرىلدى. ونىڭ ۇشەۋى بويىنشا ۇكىم شىققان»، - دەدى ول اگەنتتىكتىڭ Facebook پاراقشاسىندا وتكەن ونلاين بريفينگ بارىسىندا.

سونىمەن قاتار ول وتكەن جىلدان بەرى اگەنتتىك باسشىلىعىنىڭ ازاماتتاردى جەكە قابىلداۋ كەستەسىنە وزگەرىس ەنگىزىلگەندىگىن اتاپ ءوتتى.

«سىبايلاس جەمقورلىققا قارسى ءىس-قيمىل اگەنتتىگىنىڭ ءتوراعاسى ازاماتتاردى اپتا سايىن، باسشىلىق قۇرام كۇندەلىكتى قابىلدايدى. وسى جىلىدڭ 5 ايىندا اگەنتتىك 561 جەكە قابىلداۋ وتكىزدى. 649 ماسەلە بويىنشا 764 ازامات جۇگىندى. كەلىپ تۇسكەن ماسەلەلەردىڭ 35 پايىزى قاناعاتتاندىرىلدى. ىندەتكە بايلانىستى ازاماتتاردى قابىلداۋ شۇعىل ماسەلەلەر بويىنشا عانا جۇزەگە اسىرىلىپ جاتىر. ازاماتتارعا نەگىزىنەن جازباشا شاعىمدانۋ، ەلەكتروندى ءوتىنىم جىبەرۋ ارقىلى جۇگىنۋگە كەڭەس بەرىلەدى. شاعىمداردىڭ قارالۋ بارىسىنا ۇنەمى ساراپتاما جاسالىپ وتىرادى. اگەنتتىك ءتوراعاسى دا بۇل ماسەلەنى ءوزى باقىلاۋعا العان. مىنە وسىنداي جان- جاقتى شارالاردىڭ ناتيجەسىندە شاعىمدار سانى جىلدان جىلعا ارتىپ كەلەدى. وسى جىلدىڭ ءبىرىنشى جارتىجىلدىعىندا شاعىمدار سانى 26 پايىزعا ارتىپ، 4725 كە جەتىپ وتىر»، - دەدى قۋانىش مىرزاعالي.

ونىڭ دەرەگىنشە، كارانتين كەزىندە كەلىپ تۇسەتىن شاعىمدار سانى 2 ەسە ارتىپ كەتكەن. ال ماۋسىم ايىندا ءبىر كۇننىڭ وزىندە ازاماتتاردان 76 شاعىم كەلىپ تۇسكەن. وسى ارالىقتا ەلەكتروندى شاعىمدار سانى دا 2,5 ەسە ارتىپ وتىر.