22:36, 04 - ماۋسىم 2020 | GMT +6
جامبىلدا زەينەتكەر ايەل وقۋعا ءتۇسىرىپ بەرەم دەپ الداپ، 2 ميلليون تەڭگەنى قالتاسىنا باسقان
تاراز. قازاقپارات - جامبىل وبلىسىندا جوعارى وقۋ ورنىنا تۇسىرۋگە ۋادە بەرگەن الاياق 2 ميلليون تەڭگەنى قالتاسىنا باسقان، دەپ حابارلايدى قازاقپارات.
جۋالى اۋدانىندا 63 جاستاعى تۇركىستان وبلىسىنىڭ تۇرعىنى تۇلەكتەردىڭ اتا- اناسىنا ەلىمىزدىڭ اكادەميالارىنىڭ بىرىنە تۇسۋگە كومەكتەسۋگە ۋادە بەرىپ، ەڭبەگى ءۇشىن الدىن الا 1200000 تەڭگە العان. اقشانى العاننان كەيىن تايىپ تۇرعان.
«كۇدىكتى ايەلدى جامبىل وبلىسى كريمينالدىق پوليتسيا قىزمەتكەرلەرى قولعا ءتۇسىردى. ونىڭ وسى سەكىلدى ەكى قىلمىسقا قاتىسى بار ەكەنى انىقتالدى. جالپى شىعىن كولەمى - 2 ميلليون تەڭگە»، - دەيدى دپ باسشىسىنىڭ ورىنباسارى نۇرجان قالمەتوۆ.
اتالعان فاكتىلەر قاتىستى ق ر قىلمىستىق كودەكسىنىڭ 190-بابى 3-بولىگى بويىنشا سوتقا دەيىنگى تەرگەۋ ءجۇرىپ جاتىر. جامبىل وبلىستىق پوليتسيا دەپارتامەنتى تۇرعىنداردى الاياقتاردىڭ قۇربانىنا اينالماس ءۇشىن ساق بولۋعا شاقىرادى.