18:28, 30 - مامىر 2020 | GMT +6
سەمەي - ءۇرجار باعىتىنداعى ان-2 ۇشاعى ورتەندى
نۇر- سۇلتان. قازاقپارات - ءۇرجار اۋەجايىنا كەلىپ قونعان ان-2 ۇشاعىنان ءورت شىقتى.
بۇل قازاقپارات ق ر يندۋستريا جانە ينفراقۇرىلىمدىق دامۋ مينيسترلىگىنىڭ Telegram پاراقشاسىنا سىلتەمە جاساپ حابارلايدى.
«بۇگىن ساعات 15:31 دە قونعاننان كەيىن «تاراز جاڭا الەم» جەكە اۋە كومپانياسىنىڭ ان-2 ۇشاعى تۇتاندى. اۋە كەمەسى سەمەي - ءۇرجار باعىتى بويىنشا TJA5221 سانيتارلىق رەيسىن ورىندادى. ۇشاق 15:25 تە قوندى. ءورت ۇشاق جەرگە قونعاننان كەيىن بولعان، اۋە كەمەسىنىڭ بورتىندا ادامدار بولعان جوق. ساعات 15:50 دە ءورت ءسوندىرىلدى. زارداپ شەككەندەر جوق»، دەلىنگەن حابارلامادا.
اتالعان فاكتى بويىنشا ق ر يندۋستريا جانە ينفراقۇرىلىمدىق دامۋ مينيسترلىگىنىڭ اۆياتسيالىق وقيعالاردى تەكسەرۋ باسقارماسى وقيعا تەرگەۋىن باستادى.
اۆتور: مارلان جيەمباي