تۇرعىلىقتى مەكەنجايى جوقتار اراسىندا 2 ادام كوروناۆيرۋس جۇقتىرعان – ساعىنتايەۆ

الماتى. قازاقپارات - الماتىدا وتكەن ونلاين بريفينگ بارىسىندا قالا اكىمى باقىتجان ساعىنتايەۆ تۇرعىلىقتى مەكەنجايى جوق ادامداردىڭ اراسىنان دا 2 ادامدا كوروناۆيرۋس انىقتالعانىن ايتتى، دەپ حابارلايدى قازاقپارات ءتىلشىسى.

قالا اكىمىنىڭ ايتۋىنشا، ولارعا ارنايى قالاشىق جاسالىپ، ءومىر سۇرۋگە قولايلى ورتا جاسالعان. كەيبىر ب ا ق بەتتەرىندە قالاشىقتا كوروناۆيرۋستان قايتىس بولعاندار بار ەكەندىگى ايتىلعان بولاتىن.

«ناۋرىزدىڭ اياعىندا وسىنداي ازاماتتاردى جيناپ، ولارعا ارنايى شاتىرلى قالاشىق اشىلعان بولاتىن. ىستىق تاماق، جۋىناتىن بولمە، بارلىعى قامتىلدى. ءبىراق، بۇل ادامدار ءبىر ورىندا تۇرمايدى ەكەن. ولاردى ۇستاپ وتىرۋدا قيىندىقتار بولدى. ءبىر ادام قايتىس بولعان. ءبىراق، ول كوروناۆيرۋستان ەمەس، اراقتى كوپ ىشكەننەن قايتىس بولدى. دارىگەرلەر ولاردان تالداۋ العاندا ەكى ادامدا كوروناۆيرۋس بار ەكەندىگى انىقتالدى. ولار ەمدەلىپ شىقتى. كارانتين رەجيمى اياقتالعاندا، قالاشىق تاراتىلدى»، - دەدى قالا اكىمى.

اۆتور: گۇلميرا عوسمانالي