13:45, 08 - ءساۋىر 2020 | GMT +6
قىزىلوردادا كوروناۆيرۋس جۇقتىرعان 2 ناۋقاس اۋرۋحاناعا جاتۋدان باس تارتقان
قىزىلوردا. قازاقپارات - قىزىلوردا وبلىسى سىرداريا اۋدانىندا بۇگىن تاڭەرتەڭ انىقتالعان 3 ناۋقاستىڭ ەكەۋى قويىلعان دياگنوزعا سەنبەي، اۋداندىق جۇقپالى اۋرۋلار اۋرۋحاناسىندا ەم الۋدان باس تارتقان، دەپ حابارلايدى قازاقپارات ءتىلشىسى.
بۇل جونىندە وبلىستىق دەنساۋلىق ساقتاۋ باسقارماسىنىڭ باسشىسى جاقسىلىق ابدۋسامەتوۆ وڭىرلىك كوممۋنيكاتسيالار قىزمەتىندە وتكەن بريفينگتە ايتىپ بەردى.
«سىرداريا اۋدانىنداعى 2 ناۋقاس وزدەرىنە قويىلعان دياگنوزعا قارسىلىق تانىتقان وقيعا كەزدەستى. مۇنداي جاعداي جۇمىسىمىزعا كەدەرگى كەلتىرەدى. ءبىز تۇرعىنداردى تۇسىنىستىك تانىتۋعا شاقىرامىز»، - دەدى باسقارما باسشىسى. سونداي-اق، باسقارما باسشىسى ارال اۋدانىندا تىركەلگەن 1 ناۋقاس «استانا - قىزىلوردا» باعىتىنداعى پويىزدا جولسەرىك بولعاندىعىن ايتىپ ءوتتى.
ول تۇركىستان وبلىسىنداعى قاۋىپتى ىندەتتى جۇقتىرعان ناۋقاستى تاسىمالداعان. سوڭعى دەرەكتەر بويىنشا قىزىلوردا وبلىسىندا 72 ادام كوروناۆيرۋس ينفەكتسياسىن جۇقتىرعان.