تۇركىستاندىق كاسىپكەر 2 ميلليون تەڭگەنىڭ ەت ونىمدەرىن ەلگە تاراتتى
كوروناۆيرۋس ىندەتىنە قارسى كۇرەستى كۇشەيتۋ، كومەككە مۇقتاج تۇرعىنداردى قولداۋ ماقساتىندا قولعا الىنعان اكسياعا جاناشىر ازاماتتار اتسالىسۋدا، دەپ حابارلايدى قازاقپارات «Nur Otan» پارتياسى تۇركىستان وبلىستىق فيليالىنىڭ باسپا ءسوز قىزمەتىنە سىلتەمە جاساپ.
تۇركىستان وبلىسىنىڭ كاسىپكەرى، «ورداباسى قۇس» ج ش س-نىڭ ديرەكتورى، باستاۋىش پارتيا ۇيىمىنىڭ ءتوراعاسى مۇرات تاعايەۆ تا ايرىقشا ۇلەس قوسىپ، 2800 كەلى كۇركەتاۋىق ەتى ونىمىمەن دەمەۋشىلىك كورسەتتى.
«مەملەكەت تاراپىنان قاۋىپتى ىندەتتى تاراتپاۋ، تۇرعىنداردىڭ ءال-اۋقاتىن كوتەرۋ ءۇشىن اۋقىمدى جۇمىس اتقارىلىپ جاتىر. دەگەنمەن مۇنداي كەزەڭدە ءاربىر ازامات قولدان كەلگەنشە ەلگە كومەكتەسۋى كەرەك دەپ ەسەپتەيمىن. ءبىز بۇل قيىندىقتى بىرلىك پەن ءتارتىپ ارقىلى جەڭەمىز»، - دەيدى مۇرات تاعايەۆ.
ىسكەر ازامات كۇركەتاۋىق ەتىنەن ازىرلەنگەن شۇجىق جانە وزگە دە ونىمدەردى پارتيالىق جوبالار اياسىندا تۇرمىسى تومەن تۇرعىندارعا تاراتۋ ءۇشىن «ءبىز بىرگەمىز!» اكسياسىنىڭ ۇيلەستىرۋشىلەرىنە ۇسىندى. جالپى ءونىمنىڭ قۇنى 2 ميلليون تەڭگەنى قۇرايدى. پارتيا وكىلدەرى مەن ۆولونتەرلەر، «جاس وتاندىقتار» بۇل ەتتى اۋدان، قالالاردا تىزىمدەگى وتباسىلارعا اپارىپ بەرمەك.
ورداباسى اۋدانى، بادام اۋىلىندا ورنالاسقان «ورداباسى قۇس» ج ش س بۇگىندە قازاقستاننىڭ بىرنەشە ءوڭىرىن كۇركەتاۋىق ەتىمەن قامتىپ وتىر. ءونىم كولەمى دە ۇلعايىپ كەلەدى. وسى كاسىپورىندى باسقاراتىن مۇرات تاعايەۆ بۇعان دەيىن دە قايىرىمدىلىق اكسيالارىنا ۇلەس قوسىپ، دەمەۋشىلىگىمەن تانىلعان. مەسەنات ازامات، «Nur Otan» پارتياسىنىڭ مۇشەسى مۇرات تاعايەۆقا جۇرتشىلىقتىڭ العىسى مول.
