ەلوردادا كارانتيندە جاتقان 2 ناۋقاستىڭ جاعدايى اۋىر
بۇل نۇر- سۇلتان قالاسىنىڭ قوعامدىق دەنساۋلىق ساقتاۋ باسقارماسىنىڭ باسشىسى ساۋلە قيسىقوۆا ايتتى، دەپ حابارلايدى قازاقپارات ءتىلشىسى.
«قازىرگى ۋاقىتتا نۇر- سۇلتان قالاسىندا كوروناۆيسۋر جۇقتىرعاندار سانى - 107. ونىڭ ىشىندە ەكەۋى ساۋىعىپ، اۋرۋحانادان شىعارىلدى. 27 -ناۋرىز كۇنى كوروناۆيرۋس جۇقتىرعان تاعى 25 جاعداي، 28 - ناۋرىز كۇنى 32 جاعداي تىركەلدى. ونىڭ 41 ءى بۇرىن يزولياتسيادا بولعان ادامدار. ولار قازىرگى ۋاقىتتا ستاتسيونارلىق باقىلاۋدا. 6 جاعداي مونيتورينگ جۇرگىزگەن كەزدە انىقتالعان. 1 ازامات ەپيدەميولوگيالىق جاعدايى ناشار ەلدەن كەلگەن بولسا، 5 ەۋى كوروناۆيرۋس جۇقتىرعاندارمەن بايلانىستا بولعان ادامدار»،- دەدى ساۋلە قيسىقوۆا حابار 24 ارناسىندا وتكەن ونلاين بريفينگتە. قازىرگى ۋاقىتتا كوروناۆيرۋسپەن اۋىراتىنى زەرتحانالىق جولمەن دالىلدەنگەن ازاماتتىڭ ءبارى اۋرۋحانادا جاتىر.
«ولارمەن بايلانىستا بولعان ادامداردى انىقتاۋ جانە ولاردى وقشاۋلاۋ جۇمىستارى باستالىپ كەتتى. قازىرگى ۋاقىتتا قالالىق ستانتسيوناردا جاتقان كوروناۆيرۋس جۇقتىرعان ادامدار ىشىندە ەكەۋى تۇراقتى اۋىر جاعدايدا جاتىر. ولار جاساندى تىنىس الۋ قۇرىلعىسىمەن جاتىر. دارىگەرلەر كونسيليۋمى قۇرىلىپ، ەمدەۋ جولدارى مەن ادىستەرى ەنگىزىلىپ جاتىر. ولار كوروناۆيرۋستىق ينفەكسيا حاتتاماسى بويىنشا ەم الۋدى جالعاستىرۋدا. قالعان ناۋقاستاردىڭ جاعدايى قاناعاتتانارلىق. ولار دا ەم الىپ جاتىر» ، - دەيدى ول.