كۇرەستەن ازيا چەمپيوناتىندا قازاقستاندىق بالۋان قىزدار 2 التىن ەنشىلەدى

نۇر-سۇلتان. قازاقپارات - نيۋ-دەليدە (ءۇندىستان) كۇرەس تۇرلەرىنەن ءوتىپ جاتقان ازيا چەمپيوناتىندا ايەلدەر اراسىنداعى باسەكەنىڭ ەكىنشى كۇنىندە قازاقستان قۇراماسى 2 التىن، ءبىر كۇمىس جانە ءبىر قولا مەدال جەڭىپ الدى.

53 كەلىدە كۇرەسكەن تاتيانا احمەتوۆا جارىس جەڭىمپازى اتاندى. ول فينالدا الەم جانە ازيا چەمپيونى جاپونيالىق مايۋ مۋكايدانى جەڭدى.

72 كەلىدە كۇرەسكەن جاميليا باقبەرگەنوۆا ەل قورجىنىنا ەكىنشى التىندى سالدى.

62 كەلىدە كۇرەسكەن قازاقستاندىق بۇرىمدى بالۋان اياۋلىم قاسىموۆا فينالدا قارسىلاسىنا ەسە جىبەرىپ، كۇمىسكە يە بولدى.

ال 57 كەلىدە كۇرەسكەن التىناي ساتىلعان قولانى قاناعات تۇتتى. قازاقستان ايەلدەر قۇراماسى جارىستى 2 التىن، 1 كۇمىس، 5 قولا جۇلدەمەن قۇرلىقتىق بىرىنشىلىكتە جالپى كوماندالىق ەسەپتە مەدال سانى بويىنشا 3-ورىنمەن اياقتادى.