نۇر-سۇلتاندا قوعامدىق ورىندا جاسالاتىن قىلمىس سانى 2 ەسە ازايدى

نۇر-سۇلتان. قازاقپارات - وتكەن جىلى نۇر-سۇلتان قالاسىنىڭ قوعامدىق ورىندارىندا جاسالعان قۇقىق بۇزۋ فاكتىلەرىنىڭ سانى %44,9 ازايعان.

بۇل تۋرالى قالا اكىمىنىڭ ورىنباسارى ماليكا بەكتۇروۆا ءوزىنىڭ Telegram كانالىندا ءمالىم ەتتى، دەپ حابارلايدى قازاقپارات.

«ەگەر 2018-جىلى قالانىڭ قوعامدىق ورىندارىندا 14 مىڭنان استام قۇقىق بۇزۋشىلىق جاسالسا، 2019-جىلى بۇل كورسەتكىش 8 مىڭعا دەيىن ازايعان. ونىڭ ىشىندە، قالا كوشەلەرىندە جاسالعان قىلمىستار %38,4 ازايدى. بۇزاقىلىق ارەكەتتەر سانى %52,3 عا قىسقاردى»، - دەيدى ماليكا بەكتۇروۆا.

ونىڭ ايتۋىنشا، بۇگىنگى تاڭدا استانادا «سەرگەك» قوعامدىق جانە جول قاۋىپسىزدىگى جوباسى بويىنشا 13 مىڭ كامەرا ورناتىلدى. ونىڭ ىشىندە 10 مىڭى قالاداعى قوعامدىق ءتارتىپتى قاداعالايدى.

«بۇل كامەرالاردىڭ دەرەكتەرى قالاداعى كوشەلەردە بولىپ جاتقان جاعدايدى پوليتسيا قىزمەتكەرلەرى باقىلايتىن احۋال ورتالىعىنا بەرىلەدى. جول قيىلىستارىندا جانە جولدىڭ جەلىلىك ۋچاسكەلەرىندە ورناتىلعان اپپاراتتىق-باعدارلامالىق كەشەندەردىڭ قۇرامىنا كىرەتىن شولۋ كامەرالارى دا استانادا قوعامدىق قاۋىپسىزدىكتى باقىلاۋعا مۇمكىندىك بەرەدى. كامەرالار قالانىڭ جاتىن اۋداندارىندا، مەكتەپتەردىڭ جانىندا، قوعامدىق ورىنداردا ورنالاسقان» دەپ جازادى قالا اكىمىنىڭ ورىنباسارى.

سونداي-اق، مەكتەپتەردە، بالاباقشالاردا، قوعامدىق ورىندار اۋماعىندا استاناداعى قاۋىپسىزدىك دەڭگەيىن ارتتىرۋ ماقساتىندا مەنشىكتى كامەرالاردى ينتەگراتسيالاۋ جۇرگىزىلىپ جاتىر.