قازاقستاندىق جۇمىسشىلار شەتەلدىكتەرگە قاراعاندا 2 ەسە از جالاقى الادى
بۇل تۋرالى بۇگىن ۇكىمەت وتىرىسىنان كەيىن ق ر ەڭبەك جانە حالىقتى الەۋمەتتىك قورعاۋ ءمينيسترى ءبىرجان نۇرىمبەتوۆ ايتتى، دەپ حابارلايدى قازاقپارات ءتىلشىسى.
«بىزدە «م- تەحسەرۆيس» ج ش س قازاقستاندىق جانە شەتەلدىك قىزمەتكەرلەرى اراسىنداعى جالاقىعا قاتىستى تەڭسىزدىك تۋرالى اقپارات جوق. دەگەنمەن، بۇل ەلىمىز ءۇشىن ۇلكەن تاقىرىپ بولىپ تۇر. قازىرگى ۋاقىتتا بۇعان باسا نازار اۋدارىلۋدا. باس پروكۋراتۋرا مەن ەڭبەك ينسپەكتسياسى 63 كاسىپورىنعا تەكسەرۋ جۇرگىزىپ جاتىر»، - دەدى ب. نۇرىمبەتوۆ.
مينيستر اتالعان تەكسەرۋدىڭ كەيبىر دەرەكتەرىن ب ا ق وكىلدەرىنە جاريا ەتتى.
«38 كاسىپورىنعا تەكسەرۋ قازىردىڭ وزىندە اياقتالدى. وكىنىشكە قاراي، 19 ىندا قازاقستاندىق جانە شەتەلدىك جۇمىسشى اراسىندا جالاقىعا قاتىستى تەڭسىزدىك بار. ەڭبەك كودەكسىنە سايكەس، ۇلتى مەن ازاماتتىعىنا قاراماستان ءاربىر جۇمىسشىعا بىردەي جاعداي جاسالۋى ءتيىس»، - دەدى ول.
وسى ورايدا ب ا ق وكىلدەرى ءبىرجان نۇرىمبەتوۆتەن قازاقستاندىق جانە شەتەلدىك جۇمىسشى جالاقىسىنداعى ايىرماشىلىق قانشا بولعانىن سۇرادى.
«1,5-2 ەسە»، - دەپ قىسقا قايىردى مينيستر.