التاي اۋدانىندا 2 جاسار ءسابي جوعالىپ كەتتى
«17 - تامىز كۇنى التاي اۋداندىق پوليتسيا ءبولىمىنىڭ 102 نومىرىنە سرەديگورنوە اۋىلىنىڭ تۇرعىنى قوڭىراۋ شالىپ، 2017 -جىلى دۇنيەگە كەلگەن ۇلىنىڭ اۋلادان شىعىپ كەتكەنىن جانە قازىرگى ۋاقىتقا دەيىن قايدا ەكەندىگى بەلگىسىز ەكەنىن ايتتى. اقپارات تۇسكەننەن كەيىن قاجەتتى ىزدەۋ شارالارى ۇيىمداستىرىلىپ، وعان اۋداندىق پوليتسيا ءبولىمى جەكە قۇرامىنىڭ 100 قىزمەتكەرى، توتەنشە جاعدايلار قىزمەتىنىڭ 24 قىزمەتكەرى جانە 300 ەرىكتى جۇمىلدىرىلدى»، - دەلىنگەن ق ر ىشكى ىستەر مينيسترلىگىنىڭ Facebook-تەگى پاراقشاسىندا جاريالانعان اقپاراتتا.
قازىرگى ۋاقىتتا سرەديگورنوە اۋىلىنىڭ جانە جاقىن ەلدى مەكەندەردىڭ اۋماعى تەكسەرىلىپ جاتىر. ىزدەۋ شارالارىنا 36 اۆتوكولىك جانە اتتى شولعىنشىلار دا تارتىلعان. ءسابيدى ىزدەۋگە جۇمىلدىرىلعان قىزمەتتەردىڭ جۇمىسىن ۇيلەستىرۋ ءۇشىن اتالعان وڭىرگە ق ر ءى ءى م كريمينالدىق پوليتسيا دەپارتامەنتىنىڭ باستىعى ارمان بايمۋرزين، ش ق و پوليتسيا دەپارتامەنتىنىڭ باستىعى جاناربەك باقتىبايەۆ جانە التاي اۋدانىنىڭ اكىمى نۇرجان توسەيىتوۆ ارنايى بارعان.
جوعالعان ءسابي، 2017 -جىلى دۇنيەگە كەلگەن ءاليحان تالعاتوۆتىڭ بويى 80-90 س م، شاشى قارا، قىسقا. ۇستىنە بالىقتىڭ سۋرەتى بار كوك ءتۇستى فۋتبولكا، كوكشىل- سارعىش ءتۇستى شولاق شالبار كيگەن. سابيگە قاتىستى كەز كەلگەن اقپاراتتى 102 ءنومىرى ارقىلى پوليتسيا ورگاندارىنا حابارلاۋ كەرەك.
اۆتور: مارلان جيەمباي