قاجىلىققا اتتانعان 2 مىڭعا جۋىق جەرلەسىمىزگە دارىگەردىڭ كومەگى قاجەت بولدى
«بيىل مەككەدە كۇن وتە ىستىق. ونىڭ ۇستىنە ادام كوپ. تاۋلى جەر بولعان سوڭ قان قىسىمى تاعى بار. كەي قوناقۇيلەر قاعبادان الىس بولعاندىقتان قاجىلار كوبىنە جاياۋ جۇرەدى. سودان بولار تەز اۋىرىپ قالىپ جاتىر. ءتىپتى مينا جازىعى مەن شايتانعا تاس اتاتىن ارالىقتىڭ ءوزى 3 شاقىرىم. ۇلكەن كىسىلەر قينالاتىنى راس. كوبىسىنىڭ تاباندارى قاجالىپ، سۋىق سۋدان تاماعى قابىنعان. ءبىز مەيلىنشە كومەك بەرۋدەمىز»، - دەدى دارىگەر ءبىرجان دوسمايىلوۆ.
ق م د ب- نىڭ اقپاراتىنا سۇيەنسەك، وسى كۇنگە دەيىن 1744 قاجى دارىگەرلىك كومەككە جۇگىنگەن. ولارعا بارلىعى 21 مەديتسينا مامانى قىزمەت كورسەتۋدە.
«ونىڭ باسىم بولىگى جەدەل رەسپيراتورلىق ۆيرۋستى ينفەكتسيامەن كەلگەندەر. ناقتى سانى 1150 ادام. اسقازان ىشەك جولدارى اۋرۋلارىمەن 90 ادام، ونىڭ 12 سىندە وزدەرىندەگى سوزىلمالى اۋرۋلارىنىڭ ءورشۋى بولدى. 380 ادامدا تىرەك قيمىل اپپاراتى اۋرۋلارى تىركەلسە، ونىڭ 360 دا اياقتىڭ ءار ءتۇرلى قاجالۋلارى بار. سونداي اق جۇرەك قانتامىر جۇيەسى اۋرۋلارى 220، ونىڭ 215 دە ارتەريالدى قان قىسىمنىڭ جوعارىلاۋى بايقالعان. سونىمەن قاتار قانت ديابەتىمەن 4 ادام، برونح دەمىكپەسىمەن 6 ادام دارىگەردەن ەم الدى.
ءبىر ادام جەدەل اپپەندەتسيتپەن اۋرۋحاناعا جەتكىزىلىپ، بەلگىلى دارەجەدە دارىگەرلىك كومەك كورسەتىلدى. ءبىر ادام جول اپاتىنا ۇشىراپ، دەر كەزىندە جەدەل جاردەممەن اۋرۋحاناعا جەتكىزىلىپ، بارلىق زەرتتەۋ امالدارى جۇرگىزىلىپ، جەڭىل دارەجەدە باس مي جاراقاتى، دەنە جاراقاتى دياگنوزىمەن ەم تاعايىندالدى»، - دەدى ول.
ونىڭ ايتۋىنشا، ناۋقاستاردىڭ قازىرگى جاعدايى قاناعاتتانارلىق. سول سياقتى قاجەت مامان مەن ءدارى-دارمەك جەتكىلىكتى.