شىمكەنتتە 2 مىڭداي جاس ءوسپىرىمنىڭ اتا-اناسى اكىمشىلىك جاۋاپقا تارتىلعان
اتالمىش مالىمەت قالالىق پروكۋراتۋرادا وتكەن كامەلەت جاسىنا تولماعانداردىڭ جىنىستىق تيىسپەۋشىلىگىنە قاتىستى قۇقىق بۇزۋشىلىقتاردىڭ الدىن-الۋ، ۇرلىق جانە سىبايلاس جەمقورلىققا قارسى زاڭنىڭ ساقتالۋ ماسەلەلەرى بويىنشا ۇيلەستىرۋ كەڭەسىندە ايتىلدى.
جەرگىلىكتى اتقارۋشى جانە قۇقىق قورعاۋ ورگاندارى باسشىلارىنىڭ قاتىسۋىمەن وتكەن جيىندا جاسوسپىرىمدەردىڭ ىستەرى تۋرالى قۇرىلعان ءموبيلدى توپتىڭ جۇمىسى باعالاندى. اتالمىش توپ 144 الدىن الۋ جۇمىسىن جۇرگىزگەن.
اتالعان ءىس-شارالار ناتيجەسىندە اتا-اناسىنىڭ باقىلاۋىنسىز جۇرگەن 344 جاس ءوسپىرىم كامەلەتكە تولماعانداردى بەيىمدەۋ ورتالىعىنا ورنالاستىرىلعان، تۇنگى ۋاقىتتا زاڭدى وكىلىسىز تۇرعىن جايدان تىس جەرلەردە جۇرگەن 1983 جاس ءوسپىرىمنىڭ اتا-اناسى اكىمشىلىك جاۋاپقا تارتىلعان.
سونىمەن قاتار قالا پروكۋرورى ماقسات قوجابايەۆ «م ج ك» اۋماعىندا ورىن العان 3 جاستاعى ءبۇلدىرشىننىڭ ولىمىنە قاتىستى قوزعالعان قىلمىستىق ءىستى ءجىتى باقىلاۋعا العانىن اتاپ ءوتىپ، بۇل باعىتتا جەرگىلىكتى اتقارۋشى جانە قۇقىق قورعاۋ وراندارىنا ءتيىستى شارالاردى قابىلداۋدى تاپسىردى.
سونىمەن قاتار، ۇيلەستىرۋ كەڭەسىندە سىبايلاس جەمقورلىققا قاتىستى قۇقىقبۇزۋشىلىقتاردىڭ الدىن الۋ جۇمىستارىنىڭ جانە قىلمىستىق ىستەردىڭ تەرگەلۋ بارىسى قارالدى.
2019 -جىلى لاۋازىمدى تۇلعالار جاساعان سىبايلاس جەمقورلىققا قاتىستى 46 قىلمىستىق ءىس تىركەلگەن.
مەملەكەتتىك ورگاندارداعى سىبايلاس جەمقورلىققا قارسى پروفيلاكتيكالىق جۇمىستاردى جۇرگىزۋ ماقساتىندا قۇقىق قورعاۋ جانە جەرگىلىكتى اتقارۋشى ورگانداردان مەكەمەارالىق توپ قۇرۋ تۋرالى شەشىم قابىلداندى.