ماڭعىستاۋدا قۇدىققا قۇلاعان 2 ءبۇلدىرشىن بالا امان قالدى
ابىروي بولعاندا ەكى ءبۇلدىرشىندى دە دارىگەرلەر امان الىپ قالدى.
م و دەنساۋلىق ساقتاۋ باسقارماسى باسپا ءسوز قىزمەتىنىڭ حابارلاۋىنشا، 1 جاسار ءسابي كەشە ساعات 16:20 دا وبلىستىق بالالار اۋرۋحاناسىنىڭ جانساقتاۋ بولىمىنە اۋىر حالدە جەتكىزىلگەن.
«2018 -جىلى تۋعان ءسابي «سۋعا تۇنشىعۋ» دياگنوزى بويىنشا ءتۇستى. اتا-اناسىنىڭ ايتۋىنشا، بالا سايىن شاپاعاتوۆ اۋىلىندا ورنالاسقان ءۇيدىڭ اۋلاسىنداعى سۋ تولى قۇدىققا قۇلاپ كەتكەن»، - دەلىنگەن حابارلامادا.
ال، ەكىنشى وسىعان ۇقساس وقيعا مۇنايلى اۋدانىندا بولعان. وبلىستىق بالالار اۋرۋحاناسىنىڭ قابىلداۋ بولىمىنە اۋىر حالدە جەتكىزىلگەن ءبۇلدىرشىن 2016 -جىلى تۋعان.
«وعان دا «سۋعا تۇنشىعۋ» دياگنوزى قويىلعان. دارىگەرلەر دەرەۋ جانساقتاۋ بولىمىنە الىپ كەتتى. بالا 1 كۇن بويى ەس-ءتۇسسىز جاتتى. قازىر جاعدايى تۇراقتالعان. اتا-اناسى بالانى قۇدىقتىڭ ىشىنەن تاۋىپ العان. قانشا ۋاقىت وندا جاتقانىن بىلمەيدى»، - دەيدى باسپا ءسوز قىزمەتى.