ديماش كۇدايبەرگەن مينسكىدەگى 2-ەۋروپالىق ويىنداردىڭ اشىلۋىندا ءان شىرقايدى
سالتاناتتى شاراعا الەمگە تانىمال قازاقستاندىق ءانشى ديماش قۇدايبەرگەن قاتىسۋدا، دەپ حابارلايدى قازاقپارات.
اشىلۋ سالتاناتىن Belarus-1 جانە Belarus-5 تەلەارنالارى تىكەلەي كورسەتۋدە. بەلتا اگەنتتىگىنىڭ حابارلاۋىنشا، سالتاناتتى شارا ءوتىپ جاتقان «دينامو» ستاديونىندا 20 مىڭنان استام جانكۇيەر جينالعان.
ايتا كەتكەن ءجون، 2-ەۋروپا ويىندارىنىڭ اشىلۋ سالتاناتىنداعى پروديۋسەر - كومپوزيتور يگور كرۋتوي، رەجيسسەر- پوستانوۆشيك - الەكسەي سەچەنوۆ. سونداي-اق وسىناۋ اسا اۋقىمدى مادەني-سپورتتىق شوۋدا الەمگە تانىمال وپەرالىق ءانشى اننا نەترەبكو، سونداي-اق قازاقستاننان ءانشى ديماش قۇدايبەرگەن ءان شىرقايتىن بولادى.
2-ەۋروپالىق ويىنداردىڭ اشىلۋىنا ءبىر كۇن قالعاندا ديماش Instagram-داعى اككاۋنتىندا مينسك اۋەجايىندا ءوزىن قارسى العان جانكۇيەرلەرىمەن بىرگە تۇسكەن سۋرەتىن جاريالاعان بولاتىن.
بەلارۋس ەلىندەگى ەكىنشى ەۋروپالىق ويىنداردىڭ سالتاناتتى اشىلۋىندا ديماش قۇدايبەرگەن جاڭا يتاليالىق ءاندى ورىندايدى دەپ ءمالىم ەتتى الەۋمەتتىك جەلىدە ونىڭ شەت ەلدەردەگى جانكۇيەرلەرى.
ايتا كەتسەك، II ەۋرپالىق ويىن مينسكىدە 21-30- ماۋسىم ارالىعىندا وتەدى. اسا اۋقىمدى سپورتتىق فورۋمعا 50 ەلدەن 4 مىڭنان استام اتلەت قاتىسادى. سپورت الاڭدارىنداعى تارتىستى باسەكەنى تەك ەۋروپا عانا ەمەس، ازيا، افريكا، سولتۇستىك جانە وڭتۇستىك امەريكا ەلدەرىنىڭ دە جانكۇيەرلەرى كورەتىن بولادى.
جارىس سپورتتىڭ 15 تۇرىنەن ۇيىمداستىرىلادى جانە ونى 500 ميلليون تەلەكورەرمەن تاماشالايتىن بولادى.
ايتا كەتكەن ءجون، ەۋروپالىق ويىندار العاش رەت 2015-جىلى ازەربايجان استاناسى باكۋدە وتكەن بولاتىن.