پەتروپاۆلدا 2 جاسار ءسابي تەرەزەدەن قۇلاعان كەزدە، اناسى مەن اعا- اپكەسى ۇيدە بولعان
سولتۇستىك قازاقستان وبلىستىق توتەنشە جاعدايلار دەپارتامەنتى باسپا ءسوز قىزمەتىنىڭ حابارلاۋىنشا، وقىس وقيعا ءۋاليحانوۆ كوشەسىندەگى بەس قاباتتى ۇيلەردىڭ بىرىندە بولعان. بيىكتەن قۇلاعان ءسابيدى امان الىپ قالۋ مۇمكىن بولمادى. بالا جەدەل جاردەم كەلگەنشە جان تاپسىردى.
قۇتقارۋشىلاردىڭ مالىمەتىنشە، ويناپ جۇرگەن ءسابيدى ۇيدەگى اناسى مەن اعا- اپكەسى ءبىر ساتكە كوزدەن تاسا قىلعان.
«كىشكەنتاي بالا ويناپ ءجۇرىپ تەرەزە جاقتاۋىنا شىعىپ كەتكەن. ال تەرەزەدە قورعانىش بلوكيراتور بولماعان. وسىنداي قايعىلى وقيعا بولماۋى ءۇشىن تاعى ءبىر مارتە اتا- انالاردى قاۋىپسىزدىك شارالارىن ساقتاۋدى ەسكەرتەمىز. كوپ جاعدايدا بالا موسكيتتىك تورعا سەنىپ، قۇلاپ كەتەدى»، - دەيدى س ق و ت ج د باستىعىنىڭ ورىنباسارى ەرىك سارىبايەۆ.
بۇل وڭىردە بيىل تىركەلگەن وسىنداي العاشقى قايعىلى وقيعا.
مامانداردىڭ ايتۋىنشا، بىلتىر ولار تەرەزە جاقتاۋىندا جۇرگەن كىشكەنتاي بالانى قۇتقارعان. كوشەدە ءوتىپ بارا جاتقان جۇرگىنشى بەسىنشى قاباتتىڭ تەرەزەسىندە تۇرعان ءسابيدى كورىپ، قۇتقارۋشىلاردى شاقىرعان. وقيعا ورنىنا جەتكەن ماماندار بالانى اۆتوساتىنىڭ كومەگىمەن ءتۇسىرىپ الىپ، امان- ەسەن اكە- شەشەسىنە تابىستادى.
اۆتور: اقەركە داۋرەنبەك قىزى