از قامتىلعان وتباسىلارعا 2 پروتسەنتتىك يپوتەكانىڭ شارتتارى قانداي بولادى

 استانا. قازاقپارات - ق ر يندۋستريا جانە ينفراقۇرىلىمدىق دامۋ ءمينيسترى رومان سكليار الەۋمەتتىك جاعىنان از قامتىلعان وتباسىلارعا بەرىلەتىن يپوتەكانىڭ شارتتارىن جاريالادى، دەپ حابارلايدى قازاقپارات ءتىلشىسى.

«از قامتىلعان وتباسىلارعا تۇرعىن ءۇي قۇرىلىس جيناق بانكى ارقىلى 20 جىلعا جەڭىلدەتىلگەن نەسيە ەنگىزىلەدى. جىلدىق مولشەرلەمەسى 2 پروتسەنت بولادى. اتالعان نەسيە كەلەسى ساناتتار - ءتورت جانە ودان كوپ بالاسى بار وتباسىلارعا، مۇگەدەك بالاسى بار نەمەسە مۇگەدەك بالانى تاربيەلەيتىن وتباسىلارعا جانە كامەلەتكە تولماعان بالالارى بار تولىق ەمەس وتباسىلارعا بەرىلەدى. ەكى جىلدا ءبىز اتالعان ساناتتارعا 22 مىڭ جەڭىلدەتىلگەن زايم بەرۋدى جوسپارلاپ وتىرمىز"، - دەدى ر. سكليار ۇكىمەتتىڭ بۇگىنگى وتىرىسىندا.

ءمينيستردىڭ سوزىنە قاراعاندا، 22 مىڭ يپوتەكاعا ءۇش جىلدىڭ ىشىندە رەسپۋبليكالىق بيۋدجەتتەن 50 ميلليارد تەڭگەدەن بولىنەتىن بولادى.

ايتا كەتەيىك، كەشە «نۇر وتان» پارتياسىنىڭ كەزەكتى XVIII سەزىندە ق ر پرەزيدەنتى نۇرسۇلتان نازاربايەۆ تابىسى تومەن وتباسىلارعا 2-3 پروتسەنتپەن باسپانا ساتىل الۋ مۇمكىندىگىن قاراستىرۋدى تاپسىردى.

«تابىسى تومەن كوپبالالى جانە تولىق ەمەس وتباسىلارعا، مۇگەدەك بالالارى بار، از قامتىلعان وتباسىلارعا پاتەر ساتىپ الۋدىڭ قولجەتىمدىلىگىن ارتتىرۋ قاجەت. بۇل ساناتتاعى ازاماتتارعا تۇرعىن ءۇي قۇرىلىس جيناق جۇيەسى ارقىلى جىلدىق 2-3 پايىزبەن تۇرعىن ءۇي زاەمىن بەرۋ تەتىكتەرىن ازىرلەۋدى تاپسىرامىن. ول ءۇشىن تۇرعىن ءۇي قۇرىلىس جيناق بانكىنە قاراجات قاجەت بولادى جانە وعان جىل سايىن 50 ميلليارد تەڭگە ءبولۋدى تاپسىرامىن» ، - دەدى ن. نازاربايەۆ.