ءىشى اۋىراتىنىن ايتقان ەر ادامنىڭ اسقازانىنان 2 كەلى تاس، قاقپاق جانە تيىن شىقتى

  استانا. قازاقپارات - وڭتۇستىك كورەيانىڭ كويان قالاسىندا دارىگەرلەر ەر ادامنىڭ اسقازانىنان 2 كەلى تاس، شولمەكتىڭ قاقپاعى مەن تيىن الىپ شىققان.

بۇل تۋرالى Daily Mail باسىلىمى حابارلايدى.

54 جاستاعى ەر ادام دارىگەرگە بارىپ، ءىشىنىڭ اۋىراتىنىن ايتىپ شاعىمدانعان. ونىڭ ءىشى ءىسىنىپ كەتىپتى. ال ءىشىن ۇستاعان كەزدە، تەرىسىنىڭ استىندا ۇساق تاس سياقتى زاتتار بارى سەزىلگەن. سول كەزدە پاتسيەنت ءوزىن تىنىشتاندىرۋ ءۇشىن ۇساق تاستار مەن تيىنداردى جەيتىنىن مويىندادى.

رەنتگەن ەر ادامنىڭ اسقازانى بوگدە زاتتارعا تولىپ كەتكەنىن كورسەتى. باساپقىدا دارىگەرلەر ونىڭ اسقازانىنداعى زاتتاردى گاستروسكوپتىڭ كومەگىمەن الماق بولدى. الايدا اسقازانداعى بوگدە زاتتاردىڭ كوپتىگىنەن، بۇل مۇمكىن بولمادى.

 

دارىگەرلەر پاتسيەنتتىڭ اسقازانىنان تاستار، شولمەكتىڭ قاقپاقتارى مەن تيىنداردى الىپ شىعۋ ءۇشىن وتا جاسادى. ەر ادام اۋرۋحانادا 9 كۇن جاتتى.

Stan.kz