الماتىدا كوپبالالى وتباسىلار 2 پايىزبەن باسپانالى بولادى

الماتى. قازاقپارات - الماتى اكىمى باۋىرجان بايبەك تۇرعىندارمەن جىل سايىنعى ەسەپتى كەزدەسۋى كەزىندە قالاداعى كوپبالالى نەمەسە تولىق ەمەس وتباسىلاردى قولداۋعا باعىتتالعان تۇرعىن ءۇي باعدارلاماسى تۋرالى ايتتى، دەپ حابارلايدى قازاقپارات ءتىلشىسى.

اكىم قالالىقتارعا، سونىڭ ىشىندە كوپبالالى وتباسىلارعا الەۋمەتتىك كومەك كورسەتۋدىڭ تيىمدىلىگىن ارتتىرۋعا ەرەكشە نازار اۋداردى.

ونىڭ ايتۋىنشا، الماتىدا «باقىتتى وتباسى» ارنايى الەۋمەتتىك تۇرعىن ءۇي باعدارلاماسى قولعا الىنادى.

«كەزەكتە تۇرعان 1276 كوپبالالى جانە تولىق ەمەس وتباسىنىڭ كوپشىلىگى تۇرعىن ءۇيدىڭ العاشقى جارناسىن تولەي المايتىندىقتان قالا بيۋجەتىنەن 1 ميلليون تەڭگەنىڭ تۇرعىن ءۇي سەرتيفيكاتتارى بەرىلەدى. العاشقى جارنا پاتەر قۇنىنىڭ %10 ىن قۇرايدى، تولەم 18 جىلعا %2 بەن. ءبىز وتكەن ەكى جىل ىشىندە «الماتى جاستارى» باعدارلاماسىن ويداعىداي جۇزەگە اسىردىق. قۇنى 10 ميلليونعا دەيىنگى 238 پاتەر جاس وتباسىلارعا %5 دىق نەسيەلەرمەن بەرىلدى. بۇل ىستە ناقتىلى تاجىريبەمىز بار»، - دەدى باۋىرجان بايبەك.

جاڭادان سالىنعان ۇيلەردەگى قۇنى 15 ميلليون تەڭگەدەن اسپايتىن شاعىن پاتەرلەرگە عانا نەسيەلەر بەرىلەدى. بيىل الاتاۋ جانە ناۋرىزباي اۋداندارىندا وسىنداي 500 دەن استام پاتەر بەرىلەدى. بۇدان وزگە، ەسكى ۇيلەر ءسۇرىلىپ، ولاردىڭ ورىندارىنا جاڭالارى سالىنادى. مەملەكەتتىك-جەكەشەلىك ارىپتەستىك بويىنشا بەس جىل ىشىندە 23 پاتەر سالۋ جوسپارلانعان.

ايتا كەتەرلىگى، سوڭعى 3 جىل ىشىندە 10 مىڭنان استام الماتىلىق وتباسى جاڭا پاتەرگە قونىستاندى. ونىڭ ىشىندە 1356 پاتەر قالالىق تۇرعىن ءۇي قورىنان ءبولىندى، 8 مىڭنان استامى جەڭىلدەتىلگەن يپوتەكا بويىنشا تاراتىلدى. جاڭا قونىسقا يە بولعانداردىڭ %40 الەۋمەتتىك جاعدايى تومەن كاتەگورياداعىلار: 2375 پاتەر كوپبالالى جانە تولىق ەمەس وتباسىلارعا، 564 ءى مۇمكىندىگى شەكتەۋلى جاندارعا، 345 پاتەر جەتىم بالالارعا، 165 پاتەر زەينەتكەلەر مەن ارداگەرلەرگە بەرىلدى.