جاس ءوسپىرىم بالا ورتەنىپ جاتقان ۇيدەن 2 بالانى قالاي قۇتقارعانىن ايتتى
باقىتجاننىڭ سوزىنشە، سول كۇنى ول كوشەدە كولىكتە وتىرعان. كەنەتتەن كورشىنىڭ اراي ەسىمدى قىزى ۇلەرىندە ءورت شىققانىن ايتىپ، كومەك سۇراپ كەلگەن.
«ۇيدە انام بار ەدى. ءبىراق مەن وعان ايتۋعا ۇلگەرمەي، دەرەۋ جانىپ جاتقان ۇيگە باردىم. قاراسام ءۇيدىڭ ىشىندە ءورت شىعىپ، جان-جاعى جانىپ جاتىر ەكەن. سول ءۇيدىڭ 6 جاسار قىزى مەن 3 جاسار بالاسى ءبىر شەتتە قورقىپ وتىردى. تۇتىنگە تۇنشىققان با، ايتەۋىر ەسىنەن تانۋعا شاق قالعان. دەرەۋ كىشكەنتايىن قولىما كوتەرىپ الدىم دا، ۇلكەنىن جەتەكتەپ الىپ شىقتىم. سىرتقا شىققان سوڭ سۋ بەرىپ، كومەكتەسۋگە تىرىستىم. كورشىنىڭ ۇيىنە الىپ باردىم. انام قۇتقارۋ قىزمەتىنە حابارلاستى. كەيىن اتا- انالارى دا كەلدى»، - دەيدى جاس ءوسپىرىم بۇگىن قالالىق ت ج د وتكىزەن باسپا ءسوز ءماسليحاتىندا.
بۇگىندە سەگىزىنشى سىنىپتا وقيتىن بالا وتقا ورانعا ۇيگە كىرگەن كەزدە قورقۋعا ۋاقىت بولعان جوق دەيدى. ويتكەنى ول مەكتەپتە سونداي دايىندىق ساباقتارىنان وتكەنىن، سونىڭ ارقاسىندا تەزىرەك كومەك كورسەتۋگە ۇمتىلعانىن ايتادى.
ال، باقىتجاننىڭ سىنىپ جەتەكشىسى بولسا ونىڭ ۇيىندە ءتورت اعايىندى ەكەنىن جەتكىزدى. 13 جاستاعى وقۋشىسى ءۇيدىڭ كەنجەسى. سىنىپتا جۇرگەندە دە تەك جاقسى قىرىمەن تانىلعان.
«باقىتجان ءوزىنىڭ دوستارىنا ۇنەمى قول ۇشىن بەرىپ جۇرەتىن زەرەك بالا. بايسالدى، مەيىرىمدى، سابىرلى مىنەزى بار. تاربيە ساعاتتارىنا دا قاتىسۋى جاقسى. ونىڭ بۇل جاساعان ەرلىگى وزگە وقۋشىلارىمىزعا دا ونەگە بولىپ وتىر. ويتكەنى جانىپ جاتقان ۇيگە كىرۋگە بالا تۇرماق، ەرەسەكتەردىڭ ءوزى بارا بەرمەيدى، - دەيدى باقىتگۇل لەكەروۆا.
بۇگىن جاس قۇتقارۋشىنى قالالىق ت ج د باسشىلىعى ارنايى العىس حاتپەن ماراپاتتالدى. سونداي- اق، دەپارتامەنت باستىعى نۇربولات دەربىسوۆ «ەرلىگى ءۇشىن» مەدالىمەن ماراپاتتاۋ ءۇشىن ەلىمىزدىڭ ءىىم اتىنا جانە ارنايى العىس حاتپەن ماراپاتتاۋ ءۇشىن قالالىق اكىمدىككە ۇسىنىس جولدانعانىن جەتكىزدى.
«باقىتجان كەلەشەكتە بىزگە قۇتقارۋشى بولىپ كەلەدى دەپ سەنەمىز. مۇنداي جىگىتتەرگە ءبىز ارنايى وقۋ ورنىنا بارۋ تۋرالى ۇسىنىس ايتامىز. ءبىز ءۇشىن ونىڭ دەر كەزىندە جاساعان ارەكەتى ۇلكەن ەرلىك دەپ ايتار ەدىم. ونىڭ اتا-اناسىنا جانە ۇستازدارىنا العىس ايتامىن»، - دەدى نۇربولات دەربىسوۆ.
ورتكە ورانعان ءۇيدىڭ 7 جاستاعى قىزىنىڭ ايتۋىنشا، ءورت التى جاستاعى ءسىڭلىسى مەن 3 جاستاعى ءىنىسى وتتىقپەن ويناپ وتىرعان دا كورپە جانعان. بالالار ونى وزدەرى وشىرمەك بولعان، ءبىراق ءورت ۇلعايىپ كەتكەن.
ايتا كەتەيىك، 16 -اقپان كۇنى قالاداعى قۇرساي مولتەك اۋدانىندا جەكە ۇيدەن ءورت شىققان بولاتىن. وندا قاراۋسىز 3 بالاسى قالعان. جانىپ جاتقان ۇيدە قالعان ەكى بالانى سول ماڭدا تۇراتىن 13 جاستاعى باقىتجان بەركىنباي الىپ شىققان بولاتىن. جاس ءوسپىرىمنىڭ دەر كەزىندە قۇتقارۋ جۇمىستارىن جۇرگىزۋدىڭ ارقاسىندا ەكى ءبۇلدىرشىن امان قالدى.
