ءتورت كۇندە 2 مىڭ شاقىرىمنان استام تەمىر جول قاردان تازارتىلدى

استانا. قازاقپارات - سوڭعى ءتورت كۇن ىشىندە، ياعني 18-21- قاڭتار ارالىعىندا اۋا رايىنىڭ كۇرت بۇزىلۋىنا بايلانىستى شىعىس ءوڭىرىنىڭ بارلىق ستانتسيالارىندا جولدى قاردان تازارتۋ جۇمىستارى تاۋلىك بويى جۇرگىزىلدى.

بۇل تۋرالى «قازاقستان تەمىر جولىنىڭ» باسپا ءسوز قىزمەتىنە سىلتەمە جاساپ، قازاقپارات حابارلايدى.

جۇمىسقا شامامەن 300 تەمىرجولشى تارتىلدى. ستانسالاردا جول شارۋاشىلىعى قىزمەتكەرلەرى، قار بۇرقاسىنى كەزىندە باعىتتامالى بۇرمالاردىڭ جاعدايىنا جاۋاپتىلار تاۋلىك بويى كەزەكشىلىك ەتتى.

«قار تازارتۋ جۇمىستارىنا 44 دانا قار تازالاۋ جانە قار ارشۋ تەحنيكاسى جۇمىلدىرىلسا، بۇل رەتتە 2,5 مىڭ شاقىرىم جول قاردان ارشىلىپ، 10000 تەكشە مەتر قار شىعارىلدى. جول ديستانتسياسى قىزمەتكەرلەرى كۇش-جىگەرىنىڭ ارقاسىندا پويىزدار قوزعالىسىنىڭ كەستەسى بۇزىلعان جوق» دەلىنگەن حابارلامادا.

اۋا رايىنىڭ كۇردەلى جاعدايى مەن قاردىڭ ۇيىتقۋى جونىندە ەسكەرتىلىپ، پويىزداردى قاۋىپسىز جانە ۇزدىكسىز وتكىزۋدى قامتاماسىز ەتۋ ءۇشىن كۇن سايىن ناقتى شارالار قابىلدانىپ وتىر.