ولجاس سۇلەيمەنوۆتىڭ نەمەرەسىنىڭ قازاسى: پروكۋرور ايىپتالۋشىنى 2 جىلعا باس بوستاندىعىنان ايىرۋدى سۇرادى
ءىس بويىنشا پروكۋرور ءا. بارايەۆ سوتتان ايىپتالۋشىنى 2 جىلعا باس بوستاندىعىنان ايىرۋدى سۇرادى، دەپ حابارلايدى قازاقپارات ءتىلشىسى.
«ەسكەندىر سۇلەيمەنوۆتىڭ ۇلى دالا كوشەسىنىڭ قيىلىسىن باعدارشامنىڭ جاسىل ءتۇسى جانىپ تۇرعان كەزدە وتپەك بولعانى انىقتالدى. مىنا جايعا ءمان بەرە كەتۋ كەرەك: ول (سۇلەيمەنوۆ - اۆت. ) كوشە قيىلىسىنىڭ 80 پايىزىن ءوتىپ، قوزعالىسىن اياقتاۋعا جاقىن قالعان (...) جۇرگىزۋشى كولىگىمەن سولعا بۇرىلۋ كەزىندە قاراما-قارسى باعىتتا كەلە جاتقان كولىك قۇرالىنا جول بەرۋى كەرەك»، - دەدى پروكۋرور بۇگىنگى سوت وتىرىسىندا.
ايىپتاۋشى ءوز سوزىندە سوت وتىرىسىندا ايىپتالۋشى مۇحيتوۆانىڭ ق ر ق ك-نىڭ 345-بابى 3- بولىگى (كولىك قۇرالدارىن باسقاراتىن ادامداردىڭ جول ءجۇرىسى نەمەسە كولىك قۇرالدارىن پايدالانۋ قاعيدالارىن بۇزۋىنان ابايسىزدا ادام ولىمىنە اكەپ سوققان ءىس-ارەكەت) بويىنشا كىناسى دالەلدەنگەنىن اتاپ ءوتتى.
«قۇرمەتتى سوت، جازالاۋ ماسەلەسىن شەشە وتىرىپ، ادىلەتتى جازا ءتۇرىن ايقىنداۋ ءۇشىن بارلىق فاكتىلەر ەسكەرىلۋى كەرەك دەگەن ويدامىن. ق ر قىلمىستىق كودەكسىنىڭ 53-جانە 54- باپتارىنا سايكەس، ايىپتالۋشىنىڭ جازاسىن جەڭىلدەتەتىن جانە اۋىرلاتاتىن جايتتاردىڭ ءبارى ەسكەرىلۋى ءتيىس. جەڭىلدەتەتىن تۇسقا ايىپتالۋشىنىڭ قىلمىستى ءبىرىنشى رەت ىستەپ وتىرعانىن، ىسىنە وكىنەتىندىگىن جاتقىزۋعا بولادى. ال جازانى اۋىرلاتاتىن تۇستى ايىپتاۋشى تاراپ كورىپ وتىرعان جوق. وسىلاردىڭ ءبارىن ەسكەرە كەلە، ماليكا مۇحيتوۆانى ق ر قىلمىستىق كودەكسىنىڭ 345-بابى 3-بولىگى بويىنشا كىنالى دەپ تاۋىپ، ەكى جىلعا باس بوستاندىعىنان ايىرۋ، كولىك قۇرالىن باسقارۋ قۇقىعىنان ءۇش جىل مەرزىمگە ايىرۋ جازاسىن تاعايىنداۋ سۇرالادى»، - دەدى پروكۋرور.
پروكۋرور ايىپتالۋشى جازاسىن قىلمىستىق-اتقارۋ جۇيەسىنىڭ مينيمالدى قاۋىپسىزدىك مەكەمەسىندە وتەۋى كەرەكتىگىن سۇرادى.
ەسكە سالا كەتسەك، وسى جىلدىڭ ماۋسىمىندا استاناداعى جول اپاتىندا ولجاس سۇلەيمەنوۆتىڭ 26 جاستاعى نەمەرەسى ەسكەندىر سۇلەيمەنوۆ مەرت بولعان ەدى. ەسكەندىر تىزگىندەگەن موتوتسيكل قيىلىسقا شىققان كولىككە سوعىلدى.
ارادا كوپ وتپەي استانا قالالىق ىشكى ىستەر دەپارتامەنتى اپاتقا سەبەپكەر بولۋى مۇمكىن Hyundai اۆتوكولىگىنىڭ يەسى، 29 جاستاعى استانالىق كەلىنشەككە قاتىستى تەرگەۋ امالدارى ءجۇرىپ جاتقانىن حابارلاعان ەدى.
سونداي-اق، قالالىق پوليتسيا دەپارتامەنتى ەسكەندىر سۇلەيمەنوۆتىڭ موتوسيكلى سوعىلعان جۇرگىزۋشى قىزىلوردا وبلىستىق ىشكى ىستەر دەپارتامەنتى باستىعىنىڭ قىزى ەكەنىن راستاعان.
ايتا كەتسەك، 12 -قازاندا ولجاس سۇلەيمەنوۆتىڭ نەمەرەسىنىڭ ولىمىنە قاتىستى سوت پروتسەسى باستالىپ، ەسكەندىر سۇلەيمەنوۆ قازا تاپقان جول اپاتى بويىنشا سوتتالۋشى ماليكا مۇحيتوۆا مارقۇمنىڭ اتا-اناسىنان كەشىرىم سۇراعان ەدى.
ايتا كەتەرلىگى، وتكەن سوت وتىرىسىندا ەسكەندىر سۇلەيمەنوۆتىڭ تۋىستارى كەلتىرىلگەن زالالدى وتەۋدى (14 ميلليون تەڭگە) تالاپ ەتكەن.
دەگەنمەن، سوت وتىرىسىنان كەيىن ەسكەندىر سۇلەيمەنوۆتىڭ اناسى ۇلىنا قاتىستى سوتتان تەك ءادىل ۇكىم كۇتەتىنىن ءمالىم ەتكەن ەدى.