استانادا 2 اۆتوبۋس سوقتىعىسىپ، وقۋشىلار زارداپ شەكتى

استانا. قازاقپارات - ەلوردادا سارى ارقا جانە سەيفۋللين كوشەلەرىنىڭ قيىلىسىندا №102 جانە №46 -اۆتوبۋستارى سوقتىعىسىپ، بويجەتكەن مەن ءتورت وقۋشى زارداپ شەكتى، دەپ حابارلايدى قازاقپارات ءتىلشىسى.

بۇدان بۇرىن الەۋمەتتىك جەلىدە استانادا اۆتوبۋستاردىڭ قاتىسۋىمەن جول- كولىك وقيعاسىنا كۋا بولعان ادامنىڭ ۆيدەوجازاسى جاريالانعان ەدى. «استانا LRT»  ج ش س باسپا ءسوز قىزمەتى اتالعان جول- كولىك وقيعاسىنىڭ بۇگىن تىركەلگەنىن راستادى.

«وقيعاعا كىنالى - №102 -اۆتوبۋستىڭ جۇرگىزۋشىسى. ول قاپتال تۇرعىسىنان ارالىقتى ساقتاماۋىنىڭ سەبەبىنەن №46 -اۆتوبۋسپەن سوقتىعىسقان. اتالعان وقيعا بويىنشا №102 -اۆتوبۋستىڭ جۇرگىزۋشىسىنە قاتىستى حاتتاما تولتىردى. جۇرگىزۋشى پروتسەسسۋالدىق شەشىم قابىلداعانشا جۇمىستان شەتتەتىلدى. كەيىن ول «قارا تىزىمگە» ەنەتىن بولادى. بۇل دەگەنىڭىز ول الداعى ۋاقىتتا قوعامدىق كولىك سالاسىندا جۇمىس ىستەي المايتىنىن بىلدىرەدى»، - دەپ حابارلادى «استانا LRT»  ج ش س- دان.

كومپانيانىڭ حابارلاۋىنشا، پروتسەسسۋالدىق شەشىم شىققانشا №46 -اۆتوبۋستىڭ دا جۇرگىزۋشىسى جۇمىستان شەتتەتىلگەن.

اۆتوبۋسپەن بولعان جول اپاتىنان ءبىر بويجەتكەن مەن ءتورت وقۋشىنىڭ زارداپ شەككەنى بەلگىلى بولدى.

«بالالار №2 -قالالىق اۋرۋحاناعا جەڭىل جاراقاتپەن جەتكىزىلدى. ول جەردە بالالاردى نەيروحيرۋرگ پەن تراۆماتولوگ قارادى. ستاتسيونارعا جاتقىزۋ قاجەتتىلىگى تۋىنداعان جوق. سوندىقتان بالالار تراۆموتولوگتىڭ باقىلاۋىمەن تۇرعىلىقتى جەرى بويىنشا امبۋلاتوريالىق ەمدەلۋگە جىبەرىلدى. بويجەتكەندى دارىگەرلەر قاراعاننان كەيىن، ۇيىنە جىبەردى»، - دەپ حابارلادى استانا قالالىق قوعامدىق دەنساۋلىق ساقتاۋ باسقارماسىنىڭ باسپا ءسوز قىزمەتىنەن.