گۇلشارا ءابدىقالىقوۆا 2- ەۋرازيالىق ايەلدەر فورۋمىنا قاتىستى
جيىندى رەسەي فەدەراتسياسى فەدەرالدىق جينالىسىنىڭ فەدەراتسيا كەڭەسى مەن ت م د- عا قاتىسۋشى مەملەكەتتەردىڭ پارلامەنتارالىق اسسامبلەياسى ۇيىمداستىردى.
قازاقستان دەلەگاتسياسىنىڭ قۇرامىنا پارلامەنت دەپۋتاتتارى، مەملەكەتتىك ورگان باسشىلارى، قوعامدىق ۇيىم وكىلدەرى كىردى.
گۇلشارا ءابدىقالىقوۆا قۇتتىقتاۋ سوزىندە قازاقستان پرەزيدەنتى نۇرسۇلتان نازاربايەۆتىڭ «الەم. XXI عاسىر» مانيفەسىندەگى: «وتكەن عاسىرلاردىڭ قاسىرەتتى قاتەلىكتەرىن قايتالاۋعا جول بەرمەي، الەمدى سوعىس قاتەرىنەن تۇپكىلىكتى ارىلتۋ ءۇشىن ۇكىمەتتەردىڭ، ساياساتكەرلەردىڭ، عالىمداردىڭ، بيزنەسمەندەردىڭ، ونەر قايراتكەرلەرىنىڭ جانە بۇكىل الەمدەگى ميلليونداعان ادامنىڭ كۇش-جىگەرىن جۇمىلدىرۋ قاجەت» دەگەن سوزىنە نازار اۋداردى.
مەملەكەتتىك حاتشى تۇراقتى جانە ادىلەتتى قوعام قۇرۋ ءۇشىن ايەلدەر ەكونوميكا ءومىرىنىڭ بارلىق سالاسىنا تولىققاندى اتسالىسۋى قاجەت ەكەنىن اتاپ ءوتتى.
- بۇگىندە ءبىزدىڭ ەلىمىز ورتالىق ازيا مەن اۋعانستانداعى قاۋىپسىزدىكتى قامتاماسىز ەتۋگە ايرىقشا كوڭىل ءبولىپ وتىر. ءبىز تاجىكستان مەن قىرعىزستانداعى قاقتىعىستاردى جويۋعا اتسالىستىق، يران مەن سيريا جونىندەگى كەلىسسوزدەر ءۇشىن الاڭ ۇسىندىق، - دەدى مەملەكەتتىك حاتشى.
فورۋم اياسىندا مەملەكەتتىك حاتشى گۇلشارا ءابدىقالىقوۆا «ب ۇ ۇ- ايەلدەر» ۇيىمىنىڭ اتقارۋشى ديرەكتورى، ب ۇ ۇ باس حاتشىسىنىڭ ورىنباسارى فۋمزيلە ملامبو-نگكۋكامەن جانە «ايەلدەر جيىرمالىعىنىڭ» (W20) نەگىزىن قالاۋشى ءارى پرەزيدەنتى گيۋلدەن تيۋركتانمەن ەكىجاقتى كەزدەسۋلەر وتكىزدى.
وندا وزەكتى الەۋمەتتىك-ەكونوميكالىق جانە مادەني-گۋمانيتارلىق پروبلەمالار، سونداي-اق بەيبىتشىلىك پەن قاۋىپسىزدىكتى نىعايتۋ ماقساتىمەن ايەلدەردىڭ مۇمكىندىگىن ودان ءارى ارتتىرۋ، حالىقارالىق جانە وڭىرلىك باستامالار كوتەرۋدەگى ءرولىن كۇشەيتۋ ماسەلەلەرى تالقىلاندى.