بۇيرەك ترانسپلانتاتسياسى ناۋقاس ءومىرىن 2 ەسەگە ۇزارتادى - بولاتبەك بايماحانوۆ
«رەسپۋبليكالىق ۇيلەستىرۋ ورتالىعىنىڭ مالىمەتتەرىنە سۇيەنسەك، ەلىمىزدە 138 ناۋقاسقا مايىتتىك دونورلاردىڭ، 944 ناۋقاسقا - ءتىرى دونورلاردىڭ بۇيرەگى ءساتتى ورنالاستىرىلعان. ونىڭ 258- ءى سىزعانوۆ اتىنداعى ۇلتتىق عىلىمي حيرۋرگيا ورتالىعىندا جاسالعان»، - دەپ اتاپ ءوتتى بولاتبەك بايماحانوۆ.
ورتالىق ديرەكتورىنىڭ ايتۋىنشا، بۇيرەك تەراپياسىنىڭ وزگە تۇرلەرىمەن سالىستىرعاندا، بۇيرەك ترانسپلانتاتسياسى ناۋقاستىڭ ءومىرىن 1,5-2 ەسەگە ۇزارتىپ، ءومىر ساپاسىن جاقسارتادى. ناۋقاستى گەمودياليز اپپاراتىنا تاۋەلدى ەتىپ قويمايدى. باعدارلامالىق گەمودياليز الاتىن ناۋقاستار ادەتتە اپتاسىنا ءۇش رەت ءتورت ساعاتتىق پروتسەدۋرادان ءوتۋى ءتيىس.
«بۇيرەكتى ترانسپلانتاتسيالاۋ - بالالار ءۇشىن ەڭ جاقسى ءادىس، سەبەبى گەمودياليزدەن بالانىڭ دامۋىنا ايتارلىقتاي زاقىم كەلەدى. قازىرگى ۋاقىتتا بۇيرەكتى ترانسپلانتاتسيالاۋدىڭ گەتەروتوپتى جانە اللوگەندى (باسقا ادامنان ترانسپلانتاتسيا) نۇسقالارى ءجيى كەزدەسەدى. كەز- كەلگەن وتا سەكىلدى، بۇيرەك الماستىرۋعا دا ناۋقاستاردىڭ بارلىعى جىبەرىلمەيدى، مۇندا دا ءبىرقاتار قارسى كورسەتىمدەر بار»، - دەپ ءتۇسىندىردى ول.
ستاتيستيكالىق مالىمەتتەرگە سايكەس، ءتىرى تۋىستىق دونوردان ترانسپلانتاتسيالانعان بۇيرەكتىڭ ورتاشا جۇمىس ىستەۋ ۇزاقتىعى - 12-15 جىل، مايىتتىك دونوردان الىنعان بۇيرەك - 7-9 جىل. بۇيرەك ترانسپلانتاتى جارامسىز بولعان جاعدايدا دونورلىق بۇيرەكتى قايتا ترانسپلانتاتسيالاۋعا بولادى.
ايتا كەتەرلىگى، ا. ن. سىزعانوۆ اتىنداعى ۇلتتىق عىلىمي حيرۋرگيا ورتالىعى 1945 - جىلى ەكىنشى دۇنيەجۇزىلىك سوعىستىڭ ارداگەرلەرى مەن مۇگەدەكتەرىنە ارنالعان گوسپيتال بازاسىندا اشىلعان جانە العاشقى عىلىمي- زەرتتەۋ مەكەمەلەرىنىڭ قاتارىندا قازاق ك س ر عىلىم اكادەمياسىنىڭ قۇرامىنا كىرگەن. اتالمىش ورتالىقتىڭ نەگىزىن قالاۋشى جانە تۇڭعىش ديرەكتورى ( 1975 -جىلعا دەيىن) قاز ك س ر بەلگىلى عالىمى، قابىلەتتى حيرۋرگ، قاز ك س ر عىلىمىنىڭ ەڭبەگى سىڭگەن قايراتكەرى، اكادەميك الەكساندر نيكولايەۆيچ سىزعانوۆ بولعان. بۇگىندە بۇل ورتالىق - وزىق زامانۋي تەحنولوگيالار بويىنشا ەمدەۋ مەن دياگنوستيكالىق كومەك كورسەتەتىن جەتەكشى مەديتسينالىق مەكەمە.
اۆتور: ايجان سەرىكجان قىزى