استانادا 2- دۇنيەجۇزىلىك تەاتر فەستيۆالىنىڭ شىمىلدىعى اشىلدى
«قازاق كونسەرت» مەملەكەتتىك كونسەرتتىك ۇيىمىنىڭ باسپا ءسوز قىزمەتىنەن ءمالىم ەتكەندەي، اۋقىمدى جوبا ەلوردامىزدىڭ 20 جىلدىعىنا ارنالىپ وتىر.
«قازاقستان» ورتالىق كونسەرت زالىندا وتكەن سالتاناتتى اشىلۋ ءراسىمى الەم تەاترلارى ۇجىمدارىنىڭ قىزىل كىلەممەن وتۋىنەن باستالدى. شارا ودان ءارى كونسەرتتىك باعدارلامامەن جالعاستى.
شارانىڭ اشىلۋىنا قاتىسقان ق ر مادەنيەت جانە سپورت ءمينيسترى ارىستانبەك مۇحامەدي ۇلى فەستيۆال تەاتر ونەرىنىڭ زاماناۋي قالپىن جانە دامۋ ءۇردىسىن جاقسى تۇسىنۋگە كومەكتەسەتىنىن اتاپ ءوتتى. مينيستر فەستيۆالدىڭ قاتىسۋشىلارىنا جەمىستى ەڭبەك پەن شىعارماشىلىق سەرپىلىس تىلەپ، قوناقتار مەن كورەرمەندەرگە تابىس تىلەدى.
قوناقتار مەن كورەرمەندەر نازارىنا «ناز» مەملەكەتتىك تەاترىنىڭ ورىنداۋىنداعى «شاشۋ» حورەوگرافيالىق كومپوزيتسياسى، «نوماد» ەتنوفولكلورلىق انسامبلىنىڭ «ماڭگىلىك ەل» مۋزىكالىق كومپوزيتسياسى ۇسىنىلدى. م. اۋەزوۆ اتىنداعى قازاق مەملەكەتتىك اكادەميالىق دراما تەاترى «اباي» قويىلىمىنان ءۇزىندى قويدى. ا. نيازوۆا، س. بايعوجين، م. باسپايەۆا، ت. گاتاۋوۆ سىندى مەملەكەتتىك اكادەميالىق وپەرا بالەت تەاترىنىڭ سوليستەرى ونەر كورسەتتى. ال كونسەرتتى «استانا ميۋزيكل» مەملەكەتتىك تەاترى «جاينا، استانا!» مۋزىكالىق-حورەوگرافيالىق كومپوزيتسيامەن قورىتىندىلادى.
فەستيۆالدىڭ اشىلۋ سالتاناتىن بەرىك ايتجانوۆ، ەليزاۆەتا بۋكوۆا، جانەل ماكاجان جانە مارات ايتىمباي جۇرگىزدى.
ۇيىمداستىرۋشىلاردىڭ ايتۋى بويىنشا، استانا قوناقتارى مەن تۇرعىندارى تەك وتاندىق تەاتر ۇجىمدارىن عانا ەمەس، سونىمەن قاتار الەمدىك تەاتر ترۋپپالارىنىڭ ونەرىن تاماشالاي الادى. سەبەبى فەستيۆال اياسىندا قالامىزدىڭ مەرەكەسىمەن قۇتتىقتاۋ ءۇشىن يتاليا، ۇلى بريتانيا، ليتۆا، پولشا، گەرمانيا، گرۋزيا، جاپونيا، قىتاي، وزبەكستان، قىرعىزستان، رەسەي ەلدەرىنەن تەاترلار كەلدى. 13 ەلدەن كەلگەن 17 تەاتر ۇجىمى 18 قويىلىم ۇسىناتىن بولادى.
كەش حولل ەنەرگيا ساحناسىندا يتاليانىڭ اتاقتى «Piccolo Teatro di Milano» تەاترىنىڭ قويىلىمىمەن جالعاستى. ميلان تەاترى «Arlecchino servitore de du padroni» («ەكى مىرزاعا ءبىر قىزمەتشى») كومەدياسىن ساحنالادى. ءدال وسى قويىلىم - «Piccolo Teatro di Milano» تەاترىنىڭ باستى سپەكتاكلى جانە الەمدىك ساحنالارىنىڭ التىن قورىنا جاتادى.
تەاتردىڭ نەگىزىن ⅩⅩ عاسىردىڭ اتاقتى رەجيسسەرى دجوردجو سترەلەر قالاپ، سونىڭ ارقاسىندا تانىمال بولعان. قويىلىمنىڭ پرەمەراسى 1947 -جىلى وتكەن. بۇگىنگى كۇنگە دەيىن سپەكتاكل 40 مەملەكەتتە 2500 رەت قويىلىپ، گيننەس رەكوردتار كىتابىنا ەنگەن.
ايتا كەتەيىك، فەستيۆالدىڭ سالتاناتتى اشىلۋى ەرەكشە كوڭىل-كۇي سىيلاپ، 28 -ماۋسىمعا دەيىن سوزىلاتىن تەاتر مەرەكەسىن سەزىنۋگە مۇمكىندىك بەردى.
«استانا» II دۇنيەجۇزىلىك تەاتر فەستيۆالىن ق ر مادەنيەت جانە سپورت مينيسترلىگىنىڭ ۇيىمداستىرۋىمەن «قازاق كونسەرت» مەملەكەتتىك كونسەرتتىك ۇيىمى مەن قازاقستان تەاترلارى قاۋىمداستىعى وتكىزۋدە.