+7 (701) 759 90 19 Лента
17 °С : استانا
33 °С : الماتى
USD 360.12 EUR 409.67
RUB 5.33 CNY 52.34
جاڭالىقتار

سۋپەر وتباسى-2 مۋلتفيلمى قازاق تىلىندە كورسەتىلدى

14 ماۋسىم 10:43 351
:ءبولىسۋ
سۋپەر وتباسى-2 مۋلتفيلمى قازاق تىلىندە كورسەتىلدى

استانا. قازاقپارات - استانادا «نۇر وتان» پارتياسىنىڭ قولداۋىمەن سۋپەر وتباسى-2 مۋلتفيلمىنىڭ الدىن الا كورسەتىلىمى ءوتتى، دەپ حابارلايدى قازاقپارات ءتىلشىسى.

Walt Disney Pictures جانە Pixar ستۋديالارى كوپتەن كۇتكەن «سۋپەر وتباسى-2» فيلمىن قازاق تىلىندە كورەرمەندەرگە ۇسىندى.

14 جىل وتكەن سوڭ، «سۋپەروتباسى» انيماتسيالىق فيلمىنىڭ جانكۇيەرلەرى كوپتەن كۇتكەن وقيعانىڭ جالعاسىن كورۋگە مۇمكىندىك الدى. وسى ۋاقىتتىڭ ىشىندە كوپ نارسە وزگەردى، ءبىراق «سۋپەروتباسى» كەيىپكەرلەرى سول قالپىندا قالدى. فيلمنىڭ ەكىنشى بولىمىندە رەجيسسەر برەد بيەرد بارلىق نازاردى ميستەر «ەرەكشەگە» ەمەس، ونىڭ جۇبايىنا اۋدارۋدى ۇيعاردى. فيلمنىڭ جەلىسى بويىنشا حەلەن پارر وتباسىنىڭ كوشباسشىسى، ال ونىڭ كۇيەۋى دجەك- دجەك بالاقايدىڭ تاربيەسىمەن اينالىساتىن بولادى. ياعني، كورەرمەندەر بۇل جولى جاقسى كورەتىن ميستەر «ەرەكشەنى» باسقا قىرىنان كورەدى. ول ەندى سۋپەرباتىر كوستيۋمىندە پايدا بولمايدى، ونىڭ ەسەسىنە ايەلى عالامدى قۇتقارۋ ءۇشىن قاۋىپتى ميسسياعا بارا جاتقاندا، ءۇش بالاعا قامقور بولىپ قالادى.

«سۋپەر وتباسى-2» - «بولاشاق» قاۋىمداستىعىنىڭ كورپوراتيۆتىك قورىمەن قازاق تىلىنە دۋبلياجداعان 24- فيلم بولىپ تابىلادى. قازاق تىلىندەگى دۋبلياج رەجيسسەرى - شاح- مۇرات وردابايەۆ.

«مەن ءۇشىن «سۋپەروتباسى-2» فيلمى «كوكونىڭ قۇپياسى»، «گالاكتيكا ساقشىلارى. 2 ءبولىم» جانە «ورمەكشى- ادام. قايتا ورالۋ» فيلمدەرىنەن كەيىنگى جوباداعى تولىققاندى ءتورتىنشى جۇمىسىم. بۇل فيلم ءبىزدىڭ اتا - انالارىمىز، ءبىزدىڭ سۋپەرباتىرلارىمىز جايلى. بۇل فيلمدى دۋبلياجداۋ بارىسىنا تەك تەاتر ارتىستەرى عانا ەمەس، سونداي- اق كينواكتەرلار دا قاتىستى. ءاردايىم ءبىز جاڭا اكتەرلەردى اشۋعا تىرىسامىز. دۋبلياج اكتەرلەرىن ىزدەستىرۋ ماقساتىندا ءبىز ۇلكەن كاستينگ وتكىزدىك. ۇزاق ۋاقىت بويى ۆيولەتتا كەيىپكەرى ءۇشىن داۋىس تابا المادىق، فيلمنىڭ دۋبلياج توبى تەاتردىڭ جاس اكتريساسى - ايكوركەم ادىلگەرەيەۆانى اشپاس بۇرىن، بۇكىل قازاقستان بويىنشا ىزدەۋ جۇرگىزدىك»، - دەدى دۋبلياج رەجيسسەرى شاح- مۇرات وردابايەۆ.

ونىڭ سوزىنشە، باستى كەيىپكەرلەردىڭ ءبىرى - جەلاياقتى جاس اكتەر ديدار قۇرالبايەۆ دىبىستادى. ونىڭ جاسى نەبارى 11-دە، سوعان قاراماستان، ول «كوكونىڭ قۇپياسى» مۋلتفيلمىن دۋبلياجداعان اقارىس ءاشىمحانعا جاقسى باسەكەلەس بولا الادى.

«ءبىر قىزىعى، فيلممەن جۇمىس بارىسىندا مەن ايەل ادامدى دىبىستادىم. ەدنا مود - ءبىرقيلى مىنەزدى سۋپەرباتىرلارعا ارنالعان كيىم ديزاينەرى، مەن دىبىستاعان 20-شى Disney كەيىپكەرى. جالپى ايتقاندا، دۋبلياجعا 60 تان اسا اكتەر قاتىستى. قورىتىندىلاي كەلسەم، «سۋپەروتباسى-2» - ماحاببات پەن ازىلگە تولى جىلى وتباسىلىق مۋلتفيلم. مەن كورەرمەندەرگە قازاق تىلىندەگى نۇسقاسىنا بۇكىل وتباسىمەن بارۋعا ۇسىنامىن»، - دەدى شاح- مۇرات وردابايەۆ.

استانا جانە الماتى قالالارىنداعى الدىن الا قويىلعان كورسەتىلىمگە دۋبلياج اكتەرلارى، دەمەۋشىلەر، مادەني جانە شىعارماشىلىق ينتەلليگەنتسيا وكىلدەرى، جاستار ۇيىمدارىنىڭ وكىلدەرى، بالالار ءۇيىنىڭ تاربيەلەنۋشىلەرى، ب ا ق وكىلدەرى قاتىستى.

بالالارعا ارنالعان بازارلىق «سۋپەروتباسى-2» مۋلتفيلمىن 14 - ماۋسىمنان باستاپ ەلىمىزدىڭ بارلىق كينوتەاترلارىنان قازاق تىلىندە كورۋگە بولادى.

اۆتور: اباي ابىلاي ۇلى


باستى سوزدەر: قوعام,
:ءبولىسۋ
ونلاين قىزمەتكەرلەر
رەداكتور
كۇنسۇلتان وتارباي
كۇنسۇلتان وتارباي
954-049
رەداكتور
باقىتجول كاكەش
باقىتجول كاكەش
954-049
مۇراعات