سەمەيدە پاتەردە قامالىپ قالعان 2 بالا قۇتقارىلدى

سەمەي. قازاقپارات - سەمەيدە پاتەرگە قامالىپ قالعان قوس ءبۇلدىرشىن قۇتقارىلدى، دەپ حابارلايدى قازاقپارات وبلىستىق ت ج د باسپا ءسوز قىزمەتىنە سىلتەمە جاساپ.

وقيعانىڭ ءبىرى فيزكۋلتۋرنايا كوشەسىندەگى 9 قاباتتى تۇرعىن ءۇيدىڭ 6-قاباتىندا تىركەلدى. اناسى دالىزگە قوقىستى شىعارۋعا كەتكەن ۋاقىتتا ۇيدەگى 3 جاسار ءبۇلدىرشىن ەسىكتى ىشتەن جاۋىپ العان. بالانىڭ اناسى قۇتقارۋشىلاردان كومەك سۇراعان. وقيعا ورنىنا جەتكەن قۇتقارۋشىلار پاتەردىڭ قۇلپىن سىندىرىپ، ۇيگە كىرگەن.

ال ەكىنشى وقيعا بوگەمباي ۇلى كوشەسىندەگى كوپ قاباتتى تۇرعىن ۇيدە تىركەلدى. 2 جاستاعى ءسابي اناسىنىڭ سىرتقا شىققانىن كورىپ، ىشتەن ءىلىپ العان. ەسىكتى اشۋ ءۇشىن قۇتقارۋشىلار 9 قاباتقا دەيىن ارقانمەن ورمەلەپ، ىشكە پاتەردىڭ بالكونىنان كىرگەن. ابىروي بولعاندا قوس ءبۇلدىرشىن دە امان.

«پاتەر ىشىندە قامالىپ قالعان بالالاردىڭ ءومىرى مەن دەنساۋلىعىنا قاۋىپ تونگەندىكتەن، انالارى قۇتقارۋشىلاردان كومەك سۇرادى. قۇتقارۋ جۇمىستارى كەزىندە بالالاردىڭ اناسىمەن قالاي ارەكەت جاساۋ كەرەكتىگى تالقىلاندى. ءارتۇرلى جاعداي ورىن الادى. كەي كەزدە قۇلىپتى سىندىرۋعا تۋرا كەلەدى. العاشقى وقيعادا ءبىز ەسىكتى سىندىرۋ ارقىلى ىشكە ەندىك»، - دەدى مامانداندىرىلعان ءورت ءسوندىرۋ ءبولىمىنىڭ اعا قۇتقارۋشىسى مەدەت كارىمجانوۆ.

قۇتقارۋشىلار اتا-انالارعا جانە بارلىق قالا تۇرعىندارىنا بالالاردى ەرەسەكتەردىڭ قاراۋىنسىز قالدىرماۋ كەرەكتىگىن ەسكەرتەدى. جىل باسىنان بەرى وبلىستا پاتەردە قامالىپ قالۋ بويىنشا 43 وقيعا تىركەلگەن. ناتيجەسىندە 55 ادام قۇتقارىلعان. ونىڭ ىشىندە بالالار دا بار.