ەلىمىز ەلەكتروندىق ۇكىمەتتى دامىتۋدىڭ جاھاندىق رەيتينگىندە 29-ورىنعا يە - باعدات مۋسين
بۇل تۋرالى سيفرلىق دامۋ، يننوۆاتسيالار جانە اەروعارىش ونەركاسىبى ءمينيسترى باعدات مۋسين ايتتى، دەپ حابارلايدى قازاقپارات. ۆەدومستۆو باسشىسى الدىمەن Faceebok الەۋمەتتىك جەلىسىندەگى پاراقشاسىندا بايلانىس جانە اقپاراتتاندىرۋ سالاسى قىزمەتكەرلەرىن كاسىبي مەرەكەلەرىمەن قۇتتىقتاعان.
«مەملەكەت باسشىسى قاسىم- جومارت توقايەۆ پروگرەسسيۆتى كوشباسشى رەتىندە سيفرلاندىرۋدى ۇلتتىق باسەكەگە قابىلەتتىلىككە قول جەتكىزۋدىڭ نەگىزگى قۇرالى رەتىندە كورەدى. بۇل تۋرالى ول وتكەن جولداۋىندا مالىمدەگەن بولاتىن. ءبىز مەملەكەتتى سيفرلاندىرۋ جونىندەگى جۇمىستى جالعاستىرۋدامىز جانە بۇل اۋقىمدى پروتسەسس IT جانە تەلەكوممۋنيكاتسيا سالاسىنداعى كاسىبي ماماندارسىز جۇزەگە اسپايتىنى انىق. سيفرلاندىرۋ، ەڭ الدىمەن، حالىقتىڭ ءومىرىن جەڭىلدەتۋگە باعىتتالعان: قازاقستاندىقتاردى قولجەتىمدى ينتەرنەتپەن جانە ۇيالى بايلانىسپەن قامتاماسىز ەتۋ بويىنشا ۇلكەن جۇمىس جۇرگىزىلۋدە»، - دەپ جازدى مينيستر.
ول ەلىمىز ەلەكتروندىق ۇكىمەتتى دامىتۋدىڭ جاھاندىق رەيتينگىندە بۇۇ- عا مۇشە 193 ەلدىڭ ىشىندە 29-ورىنعا يە ەكەنىن دە اتاپ وتكەن. ۇكىمەتتىڭ اشىق دەرەكتەر يندەكسى بويىنشا قازاقستان ازيا ەلدەرى اراسىندا 1-ورىندى يەلەندى.
«جاسىرمايمىن، بۇل سالانىڭ ءوز پروبلەمالارى بار. مىسالى، شالعاي ەلدى مەكەندەردىڭ تۇرعىندارى ۇيالى بايلانىس، ينتەرنەت ساپاسىنا جانە ت. ب. شاعىمدانادى، ءبىز بۇل ماسەلەلەردى جەدەل شەشۋگە تىرىسامىز. IT سالاسى قىزمەتكەرلەرىنىڭ بولاشاعى زور. Fortune-500 تىزىمىندەگى كومپانيالار ەرتەڭىن ويلاپ، ۋاقىتىلى سيفرلىق دامۋ جولىن تاڭداعان كومپانيالار! بارشاڭىزدى شىن جۇرەكتەن قۇتتىقتاي كەلە، ريزاشىلىعىمدى جەتكىزەمىن، سىزدەر بولاشاق ەكونوميكانىڭ نەگىزىن قۇرىپ جاتىرسىزدار!» - دەيدى باعدات مۋسين.
ول مەرەكە قارساڭىندا قازاقستان رەسمي تۇردە ورتالىق ازياداعى Google for Startups (GfS) ۇيىمىنىڭ العاشقى سەرىكتەسى بولعانىن سۇيىنشىلەدى. ءمينيستردىڭ پايىمىنشا، بۇل وقيعا - ەلىمىزدىڭ، سونداي- اق بۇكىل IT- قوعامداستىعىمىزدىڭ ەڭبەگىنىڭ مويىندالۋى.