ءبىر جىلدا اۆتوبۋس جۇرگىزۋشىلەرىنىڭ كىناسىنەن 29 ادام مەرت بولدى
بۇل تۋرالى ق ر ىشكى ىستەر مينيسترلىگىنىڭ اكىمشىلىك پوليتسيا كوميتەتى ءتوراعاسىنىڭ ورىنباسارى سەرىك ءتۇسىپوۆ ايتتى، دەپ حابارلايدى قازاقپارات ءتىلشىسى.
«جولداعى قاۋىپسىزدىك دەڭگەيىن ايقىندايتىن تاعى ءبىر فاكتور - اۆتوكولىكتەردىڭ تەحنيكالىق جاي- كۇيى. قازىرگى ۋاقىتتا ەلىمىزدە پايدالانىلاتىن ءاربىر ءۇشىنشى كولىكتىڭ شىعارىلعانىنا 20 جىلدان اسىپ كەتكەن. وتكەن جىلى اۆتوبۋس جۇرگىزۋشىلەرىنىڭ كىناسىنەن 321 جول- كولىك وقيعاسى ورىن الىپ، 29 ادام قازا تاپتى جانە 445 ادام جاراقات الدى»، - دەدى ول مينيسترلىكتىڭ باسپا ءسوز قىزمەتى الاڭىندا وتكەن بريفينگ بارىسىندا.
ونىڭ دەرەگىنشە، ەسكى اۆتوبۋستاردىڭ باسىم بولىگى جەكە تۇلعالاردىڭ يەلىگىندە. ولار تۇراقتى ەمەس باعدارلارعا قىزمەت كورسەتەدى جانە كوپشىلىگى قاۋىپسىزدىك نورمالارىن بۇزا وتىرىپ، قايتا جابدىقتالعان.
«جىل سايىن پوليتسيا قىزمەتكەرلەرى تۇراقتى ەمەس تاسىمالعا پايدالانىلاتىن، قايتا جابدىقتالعان اۆتوبۋستاردىڭ شامامەن 500-700 فاكتىسىن انىقتايدى» ، - دەدى سەرىك ءتۇسىپوۆ.