قازاقپارات كۇنتىزبەسى: 29- قازان
اتاۋلى كۇندەر
قازاقستانداعى كۇزەت ۇيىمدارى قىزمەتكەرلەرىنىڭ كۇنى
رەسمي كاسىبي مەرەكە قازاقستاننىڭ مەرەكەلەر كۇنتىزبەسىندە 2017-جىلى پايدا بولدى جانە العاش رەت 2018-جىلعى 29- قازاندا اتاپ ءوتىلدى.
ونى ىشكى ىستەر ورگاندارىنىڭ مامانداندىرىلعان كۇزەت بولىمشەلەرىنىڭ بارلىق قىزمەتكەرلەرى جانە جەكە كۇزەت ۇيىمدارىنىڭ قىزمەتكەرلەرى اتاپ وتەدى.
تۇركيا رەسپۋبليكاسىنىڭ ۇلتتىق مەيرامى - رەسپۋبليكا جاريالانعان كۇنى
1923-جىلى وسى كۇنى تۇركيا رەسپۋبليكا بولىپ جاريالاندى. 1920-جىلى 23- ساۋىردە گرەك- تۇرىك سوعىسى كەزىندە قۇرىلعان ۇلى ۇلتتىق جينالىس تۇركيانى رەسپۋبليكا رەتىندە جاريالاعان بولاتىن.
الايدا، تۇركيا رەسپۋبليكاسى 1923-جىلعا دەيىن رەسمي تۇردە مويىندالعان جوق.
دۇنيەجۇزىلىك ينسۋلتپەن كۇرەس كۇنى
دۇنيەجۇزىلىك ينسۋلتپەن كۇرەس اياسىندا وتكىزىلگەن شارالار مەن ناۋقانداردىڭ نەگىزگى مىندەتى - ينسۋلت پروبلەماسى تۋرالى مالىمەتتەردى ارتتىرۋ، العاشقى كومەكتى دۇرىس جانە ۋاقتىلى كورسەتۋ ماڭىزدىلىعى.
ۋاقتىلى كورسەتىلگەن كومەك ادام ءومىرىن ساقتاپ قانا قويماي، مۇگەدەكتىكتىڭ الدىن الۋعا سەپتىگىن تيگىزەدى.
دۇنيەجۇزىلىك پسورياز كۇنى
وسى كۇندى اتاپ وتۋگە باستاماشى بولعان حالىقارالىق پسورياز قاۋىمداستىقتارىنىڭ فەدەراتسياسى.
بۇل كۇن پسورياز نەمەسە پسورياتتىق ارتريت اۋرۋىنا شالدىققان ادامدارعا ارنالىپ، تۇرعىنداردىڭ ول پروبلەما تۋرالى بىلۋىنە باعىتتالعان.
وقيعالار:
1949-جىلى وسكەمەن قالاسىندا ءۇلبى مەتاللۋرگيا زاۋىتى قۇرىلدى. بۇگىندە ول «قازاتومونەركاسىپ» ۇلتتىق كومپانياسىنىڭ قۇرامىندا باستى كاسىپورىن رەتىندە اتوم ستانسالارى ءۇشىن يادرولىق وتىن وندىرەدى، بەريللي، تانتال، وسى مەتالدار مەن ولاردىڭ قوسىندىلارىنان ونداعان بۇيىم شىعارادى.
1996 -جىلى پاكىستان يسلام رەسپۋبليكاسىنىڭ پرەزيدەنتى ساردار فارۋح احمەد حان لەگاري العاش رەت رەسمي ساپارمەن قازاقستانعا كەلدى. ساپار بارىسىندا ەكىجاقتى بايلانىستاردىڭ پەرسپەكتيۆالارى تۋرالى قازاقستان-پاكىستان بىرلەسكەن مالىمدەمەسىنە قول قويىلدى. پاكىستان پرەزيدەنتى ەكىجاقتى قارىم-قاتىناستاردىڭ جاعدايى جايلى ايتا كەلە، ورتالىق ازياداعى پاكىستاننىڭ ءبىرىنشى ەلشىلىگى الماتىدا اشىلعانىن ەرەكشە اتاپ ءوتتى.
1999 -جىلى الماتى قالاسىنداعى قازاقستان عىلىم اكادەمياسى عيماراتىنىڭ جانىندا ورىستىڭ ۇلى اقىنى الەكساندر پۋشكينگە ارنالعان ەسكەرتكىش ورناتىلدى. قولا ەسكەرتكىش الماتىلىق زاۋىتتاردىڭ بىرىندە قۇيىلعان، اقىن ەسىمىمەن اتالعان كوشەدە قويىلدى. جوبانىڭ اۆتورلارى - ءمۇسىنشى اناتولي بيچۋكوۆ، ساۋلەتشىلەر توقتار ەراليەۆ پەن اناتوليي انچۋگوۆ.
2010 -جىلى تالدىقورعاندا «مادەني مۇرا» پرەزيدەنتتىك باعدارلاماسىن جۇزەگە اسىرۋ اياسىندا حالىق اقىنى ءسۇيىنباي ارون ۇلىنا ەسكەرتكىش اشىلدى. بيىكتىگى شامامەن ون مەتر بولاتىن مونۋمەنت تازا قولادان قۇيىلعان، اۆتورلارى - تانىمال قازاقستاندىق ساۋلەتشى قازبەك جارىلعاپوۆ پەن ءمۇسىنشى مەرلان ازماعامبەتوۆ.
2010 -جىلى بەلىگىلى تاريحشى، ارحەولوگ جانە ەتنوگراف، اكادەميك الكەي مارعۇلاننىڭ جەكە مۇراعاتىن عالىمنىڭ قىزى دانەل مارعۇلان پاۆلودار مەملەكەتتىك ۋنيۆەرسيتەتىنە سىيعا تارتتى.
اكادەميكتىڭ قورىنداعى كوپتەگەن ماتەريالدار ءالى جارىق كورمەگەن، ولاردى ۋنيۆەرسيتەت عالىمدارى زەرتتەۋگە كىرىسپەك.
2013 -جىلى ق ر ۇلتتىق بانكى نومينالى 100 تەڭگەلىك «بوكستان الەم چەمپيوناتى. الماتى-2013» اتتى ەستەلىك كۇمىس مونەتاسىن اينالىمعا شىعاردى.
2015 -جىلى اقتوبەدە مۇكىسى بار ازاماتتارعا ارنالعان قازاقستانداعى العاشقى ۆيدەوديسپەتچەر قىزمەتى اشىلدى. ونىڭ جۇمىسىنىڭ ءمانى بىلاي: سويلەي المايتىن ءارى مۇكىس ادامدار كەز كەلگەن قوعامدىق ورىندا تىلدەسۋدەن قيىندىق تۋعاندا نوۋتبۋك نەمەسە باسقا ءبىر گادجەتتەن Skype ارقىلى جەست ءتىلىن بىلەتىن ديسپەتچەرگە حابارلاسىپ، نە قالايتىنىن سول ارقىلى اينالاسىنداعىلارعا جەتكىزە الادى.
2015 -جىلى سيان قالاسىنداعى قىتايدىڭ تاريحي بەسىگىندە ورنالاسقان شانسي پروۆينتسياسىنداعى تاريحي قۇندىلىقتاردى قورعاۋ جونىندەگى زەرتتەۋ ينستيتۋتىندا قازاقستان رەسپۋبليكاسى مەن قىتاي حالىق رەسپۋبليكاسى مادەنيەت مينيسترلىكتەرى اراسىندا تاريح جانە مادەنيەت ەسكەرتكىشتەرىن ساقتاۋ، قالپىنا كەلتىرۋ، كونسەرۆاتسيالاۋ سالاسىنداعى ىنتىماقتاستىق تۋرالى مەموراندۋمعا قول قويىلدى.
2016 -جىلى ۋفادا 3-حالىقارالىق «كۇمىس اقبوزات» ۇلتتىق جانە ەتنيكالىق كينو فەستيۆالى اياسىندا دوسقان جولجاقسىنوۆتىڭ (قازاقستان) «قۇنانباي» فيلمى امير ابدرازاكوۆ اتىنداعى «ۇلتتىق رۋح ءۇشىن» سىيلىعىنا يە بولدى.
2016-جىلى استاناداعى رەسەي عىلىم جانە مادەنيەت ورتالىعىندا «مۇسا جالەل. تاڭدامالى» اتتى ولەڭدەر جيناعىنىڭ تۇساۋكەسەرى بولىپ ءوتتى. بۇل جيناقتا العاش رەت ولەڭدەردىڭ قازاقشا اۋدارماسى ۇسىنىلعان. بىرەگەي باسىلىمعا «موابيت داپتەرى» اتتى الەمگە تانىمال تسيكلدىڭ تاتار، ورىس جانە قازاق تىلدەرىندە 14 تۋىندىسى كىرگەن.
قازاق تىلىنە قازاقستان جۋرناليستەر وداعىنىڭ مۇشەسى مۇرات ءابدىراحمانوۆ (1938-2015) ءتارجىمالاعان.
2018-جىلى ەنەرگەتيكا سالاسىنداعى قازاقستان-رۋمىنيا ينۆەستيتسيالىق قورى قۇرىلدى. قوردىڭ قىزمەتى جەرگىلىكتى ەنەرگەتيكا سالاسىن دامىتۋعا ارنالعان جوبالاردى ىسكە اسىرۋعا، رۋمىنيا نارىعىنداعى KMIG پوزيتسيالارىن ودان ءارى نىعايتۋعا باعىتتالعان.