رەسپۋبليكا بويىنشا جالاقىسى تومەن جۇمىسشىلار 29 ميلليارد تەڭگە قوسىمشا جالاقى الادى
بۇل تۋرالى بۇگىن ق ر پارلامەنتى سەناتىندا ءوتىپ جاتقان جەرگىلىكتى وكىلدىك ورگاندارمەن ءوزارا ءىس-قيمىل جونىندەگى كەڭەس وتىرىسىندا ۇلتتىق ەكونوميكا ۆيتسە-ءمينيسترى رۋسلان دالەنوۆ ايتتى، دەپ حابارلايدى قازاقپارات ءتىلشىسى.
«اعىمداعى جىلدىڭ 5 -ناۋرىزىندا مەملەكەت باسشىسى 5 الەۋمەتتىك باستاماسىن جاريالادى. ەكىنشى باستاماعا سايكەس، 25 ايلىق ەسەپتىك كورسەتكىش نەمەسە 63 مىڭ تەڭگەدەن تومەن جالاقى الاتىندار ءۇشىن جەكە تابىس سالىعىنىڭ مولشەرلەمەسى 10 ەسەگە ازايتىلادى. جالپى رەسپۋبليكادا مۇنداي ەڭبەكاقىنى 2 ميلليوننان استام ادام الادى. نەگىزىنەن بۇل - اۋىل شارۋاشىلىعى مەن ساۋدادا»، - دەدى ول.
ونىڭ ايتۋىنشا، اتالعان باستامانى ىسكە اسىرۋ ماقساتىندا مەملەكەتتىك ورگاندارمەن جانە «اتامەكەن» ۇلتتىق كاسىپكەرلەر پالاتاسىمەن بىرلەسكەن جۇمىس جۇرگىزىلدى. جۇمىس ناتيجەسى بويىنشا جالاقىسى تومەن جۇمىسشىلاردىڭ جەكە تابىس سالىعىن تومەندەتۋدىڭ وڭتايلى تەتىگى ايقىندالدى.
«ماسەلەن، ايلىققا سالىناتىن تابىس سالىعى 90 پايىزعا ازايتىلاتىن بولادى. قالعان ەڭبەكاقىعا 10 پايىز مولشەرلەمەمەن جەكە تابىس سالىعى سالىنادى. ياعني، سالىق جۇكتەمەسى 10 ەسەگە تومەندەيدى. سونىمەن بىرگە جۇمىس بەرۋشىنىڭ اكىمشىلىك شىعىندارى بارىنشا ازايتىلدى. جالپى رەسپۋبليكا بويىنشا جۇمىسشىلار 29 ميلليارد تەڭگە شاماسىندا قوسىمشا ەڭبەكاقى الاتىن بولادى»، - دەدى رۋسلان دالەنوۆ.