جاس ساربازدى قۇتقارعان قايرات ۇمبەتوۆ: قازىر دەنەمدە گراناتانىڭ 29 جارىقشاعى بار
وندا پولكوۆنيك قايرات ۇمبەتوۆ جاۋىنگەرلىك گراناتانى وكوپقا ءتۇسىرىپ العان جاس ساربازدى ءوز دەنەسىمەن جاۋىپ، اجالدان قۇتقاردى. سارباز ءدىن امان، ال پولكوۆنيكتىڭ بويىنان گراناتانىڭ الپىسقا جۋىق جارىقشاعى تابىلدى.
وتان قورعاۋشى كۇنى قارساڭىندا قازاقپارات ءتىلشىسى بەيبىت ومىردە ەرلىگىمەن تانىلعان «حالىق قاھارمانى»، «وتان» وردەنىنىڭ كاۆالەرى، «قازاقستاننىڭ 100 ەسىمىنە» ەنگەن پولكوۆنيك قايرات ۇمبەتوۆپەن سۇحباتتى ۇسىنادى.
- قايرات جارىلقاسىن ۇلى، اسكەري قىزمەتكە قالاي كەلدىڭىز؟ ەڭبەك جولىن قاي جەردە باستادىڭىز؟
- اسكەري قىزمەت - بالا كەزدەن ارمانداعان ماماندىعىم. سەبەبى، مەنىڭ اكەم - اسكەري ادام بولعان، اتام ەكىنشى دۇنيەجۇزىلىك سوعىسىنا قاتىسقان. ءوزىم تاشكەنت وبلىسى، شىرشىق قالاسىندا تۋىپ- وسكەنمىن. سول قالادا شىرشىق جوعارى داڭق كومانديرلەرىنىڭ ينجەنەرلىك ۋچيليشەسىن اياقتاپ، شىمكەنت قالاسىنداعى 6506 اسكەري بولىمىندە ەڭبەك جولىمدى باستادىم. وندا باتالون كومانديرىنە دەيىن كوتەرىلىپ، شۋچە ۇلتتىق كورعانىس ۋنيۆەرسيتەتىنە وقۋعا ءتۇستىم، پاۆلودار، وسكەمەن، قاراعاندى قالالارىندا جۇمىس ىستەدىم. 2016 - جىلى ق ر تۇڭعىش پرەزيدەنتى - ەلباسى اتىنداعى ۇلتتىق قورعانىس ۋنيۆەرسيتەتىنىڭ باس شتاب اكادەمياسى فاكۋلتەتىنە ماگيستراتۋراعا قابىلداندىم.
قازىر سوندا مەملەكەتتىك ەمتيحانعا جانە ماگيسترلىك ديسسەرتاتسيانى قورعاۋعا دايىندالىپ ءجۇرمىن. كەلەسى ايدا وقۋىمدى اياقتاپ، ۇلتتىق ۇلان قاتارىنداعى قىزمەتىمدى ءارى قاراي جالعاستىرامىن.
- جاس ساربازدى قۇتقارعان ءساتتى ەسكە الساڭىز. جاراقاتىڭىز اۋىر بولدى ما؟ سالدارى قازىر مازالاماي ما؟
- 2016 - جىلى 7 -ساۋىردە قاراعاندىداعى قاراباس كەنتىندە اسكەري ءبولىمنىڭ وقۋ-جاتتىعۋ پوليگونىندا، جاۋىنگەرلىك دايىندىق ساباعىندا قاتارداعى سارباز سۇلتانقۇلوۆ لاقتىرعان ر گ د-5 گراناتاسى وكوپتىڭ ىشىنە ءتۇسىپ جارىلدى. ول ءبارىن دۇرىس جاسادى، تەك شىن جاۋىنگەرلىك گراناتانى قولعا العاندا قوبالجىدى. ەڭ الدىمەن جاۋاپكەرشىلىكتى ويلادىم، نە جاعداي بولسا دا، قاراماعىمداعى جاس ساربازدىڭ ءومىرىن ساقتاپ قالۋ ماڭىزدى بولدى. مەنىڭ ورنىمدا بولعان كەز كەلگەن وفيتسەر دە سولاي جاسار ەدى.
جارىلىس بولعان كۇنى اباي قالاسىندا ءبىرىنشى وتا جاسالدى. ءتورت كۇننەن كەيىن قاراعاندى قالاسىنداعى ماقاجانوۆ اۋرۋحاناسىندا ەكىنشى رەت وتا جاسادى. دەنەمدە گراناتانىڭ 50-60 جارىقشاعى بار ەدى. دارىگەرلەر ونىڭ جارتىسىنا جۋىعىن الىپ تاستادى. قازىر بويىمدا 29 جارىقشاق قالدى، ولار ۋاقىتى كەلگەندە وزدىگىنەن شىعادى دەيدى. ال سالدارى ەش مازالامايدى.
- بۇل وقيعانى ارىپتەستەرىڭىز بەن وتباسىڭىز قالاي قابىلدادى؟
- ارينە، جاقسى جاڭالىق ەمەس. ارىپتەستەرىمە، باسشىلىققا بار جاعدايدى ءوزىم باياندادىم. ال وتباسىما ايتقان جوقپىن. سەبەبى ايەلىم دەكرەتتىك دەمالىستا بولدى، جۇرەگىن اۋىرتقىم كەلگەن جوق. اتا- انام، تۋىستارىم، جۇبايىم - بارلىعى وقيعانى جاڭالىقتاردان ەستىپ، حابارلاستى. ول كەزدە مەن اۋرۋحانادان شىعىپ، جۇمىسقا بارا جاتقانمىن. « الاڭدايتىن ەشتەڭە جوق» دەپ جۇباتتىم.
- قازىر ول جاۋىنگەر قايدا ءجۇر؟ سىزگە حابارلاسىپ تۇراتىن شىعار؟
- ءيا، ابزالمەن دە، ونىڭ اتا- اناسىمەن، اجەسىمەن دە جاقسى ارالاسامىز، مەرەكەلەردە ءبىر- ءبىرىمىزدى قۇتتىقتايمىز. ابزال ءوزى ۇلىمداي بولىپ كەتتى. كۇزدە جامبىل وبلىسىندا شاڭىراق قۇردى، تويىنا شاقىرعان ەدى قىزمەت بابىمەن بارا المادىم. جولىم تۇسسە، مىندەتتى تۇردە قۇتتىقتاپ شىعامىن. مەملەكەتتىك قىزمەتكە ورنالاسىپ جاتىرمىن دەگەن، قازىر جۇمىس ىستەپ جۇرگەن شىعار.
- اسكەري قىزمەتتەگى ماراپاتتارىڭىز جونىندە ايتىپ بەرسەڭىز؟
- جاۋىنگەر سۇلتانقۇلوۆتى قۇتقارعانىم ءۇشىن مەنى «حالىق قاھارمانى» اتاعىنا ۇسىنعان بولاتىن. 2016 - جىلدىڭ 7 -مامىرىندا اقوردادا ەلباسى ن. ءا. نازاربايەۆتىڭ قولىنان «حالىق قاھارمانى» اتاعىن، ايرىقشا ەرەكشەلىك بەلگىسى - التىن جۇلدىز بەن «وتان» وردەنىن الدىم. قاراعاندى وبلىسىنىڭ اكىمدىگى ەكى بولمەلى پاتەر سىيلادى. ودان بولەك، 14 شاقتى مەرەيتويلىق، قىزمەتتىك مەدالدارىم بار. جالپى اسكەري سالادا 21 جىل بويى قىزمەت ەتىپ كەلە جاتىرمىن.
- ءسىزدىڭ پىكىرىڭىزشە، بۇگىنگى كۇننىڭ ساربازدارى قانداي بولۋى كەرەك؟
- بىرىنشىدەن، اسكەري ادام ەلىنىڭ 100 پايىز پاتريوتى بولۋى كەرەك. وتانى ءۇشىن ەشتەڭەدەن ايانباۋى ءتيىس. باتىل بولۋى ءتيىس. ۇزدىكسىز ءوزىن-ءوزى دامىتاتىن، وقىپ- ۇيرەنۋدەن جالىقپايتىن، جان-جاقتى بولۋى قاجەت. بويىن شىمىر ۇستاۋى كەرەك جانە ۇلكەندەردى قۇرمەتتەۋى كەرەك. ەڭ باستى قاسيەتتەر - وسى دەپ ويلايمىن.
- وتكەن جىلى «رۋحاني جاڭعىرۋ» باعدارلاماسى اياسىنداعى «100 جاڭا ەسىم» جوباسىندا جەڭىمپاز اتانعان ەدىڭىز. ىرىكتەۋ قالاي ءجۇردى؟
- بۇل جوبادا جەڭىمپاز بولام دەپ ويلاعان جوقپىن. وعان ۇسىنىلعانىمدى جولداستارىمنان ەستىدىم. تەلەفونىما «ءسىزدىڭ ەسىمىڭىزدى «100 جاڭا ەسىم» جوباسىنا ۇسىنۋ تۋرالى ءوتىنىم بەرىلدى» دەگەن حابارلاما كەلدى. وعان اسا ءمان بەرگەن جوقپىن. كۇزدە جەڭىمپاز اتاندىڭىز دەگەن حابار كەلىپ، 1 -جەلتوقسان - تۇڭعىش پرەزيدەنت كۇنى استانادا باس قوستىق. ءۇش كۇن استانادا ەكسكۋرسيا بولىپ، 102 جەڭىمپاز ءبىر-بىرىمەن ەتەنە تانىسقان بولاتىن. داۋرەن التايەۆ، سەرگەي شەگاي سىندى قاراعاندىدان شىققان جەڭىمپازدارمەن حابارلاسىپ تۇرامىن. 1 -جەلتوقساننان كەيىن قاڭتار، ناۋرىز ايلارىندا 3-4 رەت جينالدىق. قاراعاندىدا دا باس قوستىق.
- «حالىق قاھارمانى» بولۋ، قازاقستاننىڭ 100 ەسىمىنە ەنۋ اتاقپەن بىرگە ۇلكەن جاۋاپكەرشىلىك تە جۇكتەيتىن شىعار؟
- ارينە. بۇل ەڭ الدىمەن - ۇجىم الدىنداعى ۇلكەن جاۋاپكەرشىلىك، بىرگە وقىپ جۇرگەن كۋرستاستارىمنىڭ، اتا-انام مەن تۋىستارىمنىڭ، كىشكەنتاي ۇلىمنىڭ الدىنداعى جاۋاپكەرشىلىك. شىنىمدى ايتسام، كوپشىلىك ورتادا ءوزىمدى ۇستاۋىما، ءجۇرىس-تۇرىسىما دەيىن ءجىتى ءمان بەرەتىن بولدىم.
- الداعى مەرەكەلەر قارساڭىندا قازاقستاندىقتارعا نە تىلەر ەدىڭىز؟
- 7 -مامىر - وتان قورعاۋشى كۇنى جانە 9 -مامىر - جەڭىس كۇنى قارساڭىندا ەكىنشى دۇنيەجۇزىلىك سوعىس ارداگەرلەرىن، قارۋلى كۇشتەر مەن ۇلتتىق ۇلان قىزمەتشىلەرىن جانە قاتارداعى ساربازداردىڭ بارلىعىن مەرەكەلەرىمەن قۇتتىقتايمىن. ولارعا مىقتى دەنساۋلىق، قىزمەتتە تابىس تىلەيمىن. ەلىمىزدىڭ تىنىشتىعىن ساقتاۋعا ۇلكەن ۇلەس قوسىپ، بيىك شىڭداردان كورىنە بەرسىن. ەلىمىزدە تىنىشتىق بولسىن!
