ۇلتتىق قاۋىپسىزدىك قىزمەتى 295 ميلليون كيبەرشابۋىلدىڭ جولىن كەسكەن
12 تامىز 19:57

ۇلتتىق قاۋىپسىزدىك قىزمەتى 295 ميلليون كيبەرشابۋىلدىڭ جولىن كەسكەن

نۇر-سۇلتان. قازاقپارات - مەملەكەت باسشىسى ۇ ق ك ءتوراعاسى ەرمەك ساعىمبايەۆتى قابىلدادى.

قاسىم-جومارت توقايەۆقا ۇلتتىق قاۋىپسىزدىك ورگاندارىندا جۇرگىزىلىپ جاتقان جۇيەلى ترانسفورماتسيالار مەن جۇمىستىڭ نەگىزگى ناتيجەلەرى تۋرالى باياندالدى، دەپ حابارلايدى قازاقپارات اقورداعا سىلتەمە جاساپ.

مەملەكەت باسشىسىنىڭ تاپسىرمالارىنا سايكەس ۇ ق ك قۇرىلىمى وڭتايلاندىرىلىپ، بولىمشەلەردىڭ قىزمەتتەرى مەن مىندەتتەرى ناقتىلاندى. جاۋىنگەرلىك جانە جۇمىلدىرۋ ازىرلىگىن قامتاماسىز ەتۋ، سونداي-اق داعدارىسقا قارسى باسقارۋ جۇيەسىنە جاڭا تاسىلدەر ەنگىزىلدى.

ەرمەك ساعىمبايەۆتىڭ ايتۋىنشا، قازاقستان رەسپۋبليكاسىنىڭ تەرروريزمگە قارسى ورتالىعىنىڭ جۇمىسى قايتا قۇرىلىپ، لاڭكەستىك قاۋىپ-قاتەرلەرگە قارسى ءىس-قيمىل سالاسىنداعى ۇيلەستىرۋشى ءرولى كۇشەيتىلدى. جىل باسىنان بەرى ت ق و مەملەكەتتىك ورگانداردىڭ كۇشتەرى مەن قۇرالدارىن تارتا وتىرىپ، 400 دەن استام وقۋ-جاتتىعۋ وتكىزگەن.

پرەزيدەنتكە بەرىلگەن مالىمەتتەرگە سايكەس الدىن الۋ شارالارىنىڭ ارقاسىندا مەملەكەتكە 900 ميلليارد تەڭگە كولەمىندە زالال كەلتىرۋى مۇمكىن وقيعاعا توسقاۋىل قويىلدى. 37 ميللياردتان استام قارجى بيۋجەتكە قايتارىلدى. ۇ ق ك ماتەريالدارىنىڭ نەگىزىندە 791 قىلمىستىق ءىس، سونىڭ ىشىندە 49 ى جۇيەلى سىبايلاس جەمقورلىق فاكتىلەرى بويىنشا قوزعالدى.

مەملەكەتتىك شەكارانى قورعاۋدى ۇيىمداستىرۋ كۇشەيتىلىپ، جاڭا تەحنولوگيالار قارقىندى تۇردە ەنگىزىلىپ كەلەدى. شەكارا ارناۋلى كۇشتەرى قۇرىلدى. بيىل قارۋ-جاراق پەن وق-دارىلەردى تاسىمالداۋدىڭ 203 ارەكەتىنىڭ جولى كەسىلدى. 9 مىڭنان استام شەكارا ءتارتىبىن بۇزعاندار ۇستالدى. سوماسى 3,5 ميلليارد تەڭگەدەن استام ۆاليۋتانىڭ، قۇنى 10 ميلليارد تەڭگە بولاتىن تاۋارلاردىڭ زاڭسىز تاسىمالدانۋىنا جول بەرىلگەن جوق.

ەلدىڭ اقپاراتتىق قاۋىپسىزدىگىن قامتاماسىز ەتۋ جۇيەسى جەتىلدىرىلىپ جاتىر. جىل باسىنان بەرى ۇ ق ك تەحنيكالىق قىزمەتتەرى ينفراقۇرىلىم وبەكتىلەرىنە جاسالعان 295 ميلليون كيبەرشابۋىل مەن 2 مىڭ DDoS- شابۋىلدىڭ جولىن كەستى.

قۇقىق قورعاۋ ورگاندارىمەن بىرلەسىپ، قارۋ ىزدەۋ، قوعامعا قاۋىپتى ۇيىمداسقان قىلمىستىق توپتاردىڭ جانە ەسىرتكى كونترابانداسى ارنالارىنىڭ جولىن كەسۋ بويىنشا ءىس-شارالار جۇرگىزىلىپ كەلەدى.

900 كەلىدەن استام ەسىرتكى جانە 11 توننا پرەكۋرسورلار الىنىپ، 16 ەسىرتكى زەرتحاناسى، 24 حالىقارالىق جانە 45 وڭىرلىك ەسىرتكى ارناسى جويىلدى. زاڭسىز اينالىمداعى 773 بىرلىك قارۋ مەن 20 مىڭنان استام وق-ءدارى تاركىلەندى.

كەزدەسۋ سوڭىندا مەملەكەت باسشىسى ۇ ق ك ورگاندارى قىزمەتىنىڭ باعىتتارى بويىنشا وزەكتى سىن-قاتەرلەر مەن قاۋىپتەردى ەسكەرە وتىرىپ، ءبىرقاتار ناقتى تاپسىرما بەردى.

جاڭالىقتار