بۇگىن استانادا مەملەكەتتىك باعدارلاما اياسىندا 292 وتباسىنا پاتەر بەرىلدى
قوشقاربايەۆ كوشەسىندەگى №39 ۇيدەن كەزەكتە تۇرعان 146 وتباسى باسپانالى بولدى. ولار - جەڭىلدىكپەن پاتەر العاندار، بيۋدجەتتىك ۇيىمداردىڭ جۇمىسشىلارى، ال قالعاندارى «تۇرعىن ءۇي قۇرىلىس جيناق بانكىندەگى» كونكۋرس بويىنشا الدى.
ءۇيدى قالا اكىمدىگىنىڭ تاپسىرىسىمەن «نۇرلى جەر» باعدارلاماسى بويىنشا «مەيىر- م» ج ش س سالعان.
وتباسىلاردىڭ بىرنەشەۋىنە پاتەر كىلتىن استانا اكىمى اسەت يسەكەشيەۆتىڭ ءوزى تابىستادى.
«قىمباتتى استانالىقتار، بۇگىن - قاسيەتتى رامازان ايىنىڭ العاشقى كۇنىندە 300 گە جۋىق وتباسى وسى ۇيدەن پاتەرلى بولدى، سونىڭ 146 سى كەزەكتە تۇرعاندار. جىل سوڭىنا دەيىن بارلىق مەملەكەتتىك باعدارلاما بويىنشا 1000 نان استام پاتەر سالىنادى. سىزدەردى قۇتتىقتايمىن، قونىس قۇتتى بولسىن!» ، - دەدى اسەت يسەكەشيەۆ.
تۇرعىن ءۇي ماڭىندا ازىرەت سۇلتان مەشىتى، ۇلتتىق مۋزەي، بەيبىتشىلىك جانە كەلىسىم سارايى ورنالاسقان. تۇرعىن ۇيدەن جاڭا «نۇرلى جول» تەمىرجول ۆوكزالىنا قاراي تۋرا تارتۋعا بولادى.
«بۇگىن قالا اكىمىنىڭ قولىنان پاتەر كىلتىن الدىق، قۋانىشىمىزدا شەك جوق. وسى كۇندى كوپ كۇتتىك، ءبىراق بۇگىن ءبارى ۇمىتىلدى، ەندى ءبارى ارتتا قالدى. وسىنداي باعدارلامالار كوبەيە بەرسىن، ءاربىر قازاقستاندىقتىڭ ءوز باسپاناسى بولسىن!» - دەپ اعىنان جارىلدى ەلوردا تۇرعىنى دينا قاپاشيەۆا.
2018 -جىلى استانادا مەملەكەتتىك باعدارلامامەن تاعى دا 6 كوپ پاتەرلى تۇرعىن ءۇي كەشەنى سالىنباق. ولارداعى پاتەرلەردىڭ جالپى اۋدانى 60,58 مىڭ شارشى مەتر بولادى. «نۇرلى جەر» باعدارلاماسى بويىنشا 386 پاتەر، ال كەزەكتە تۇرعاندارعا جالعا بەرىلەتىن باسپانا باعىتى بويىنشا 677 پاتەر بولىنەدى.
اكىمدىك بەرگەن مالىمەتكە قاراعاندا، بۇگىنگى تاڭدا 48579 ادام كەزەكتە تۇر.